د مور او پلار شتون د ژوند په دښته کې د هغو دوو سترو، سیوريو لرونکو او میوه لرونکو ونو په څېر دي، چې د نړۍ هېڅ طوفان او ګرمي د هغوی تر سیوري لاندې انسان ته زیان نه شي رسولی. که ژوند یو کتاب وي، نو مور او پلار یې تر ټولو ښکلې، زرینه او رنګینه پاڼه ده؛ هغوی د خدای پاک د لورینې او رحمت داسې دوه بې ساري رنګونه دي چې د انسان وجود ته مانا او روح بښي.
راځئ د دې دوو عظیمو هستیو رنګین اړخونه جلا جلا وګورو:
د مور غېږ؛ د مینې او عاطفې شین باغ :
مور د کائناتو تر ټولو نرم، سپېڅلی او زړه راښکونکی رنګ دی. د هغې په مینه کې هېڅ غرض، تمه او شرط نه وي.
د لومړنۍ نغمې رنګ: د مور د لوري لومړۍ لېدنه او د هغې د لورې (الله هو يا لولو) غږ د انسان د روح لپاره د لومړي سهار د نسیم په څېر دی.
د بښنې او زغم سمندر:
مور هغه رنګ دی چې د اولاد هر غم په خپل زړه کې جذبوي او په بدل کې یې ورته د مسکا او دعاوو شنه باغونه ډالۍ کوي. د هغې تر پښو لاندې جنت یوازې یو شعار نه دی، بلکې د هغې د بې کچې قربانیو رښتنې حقیقت دی.
د پلار شتون؛ د همت او دبدبې لوړ غر:
پلار د ژوند په اسمان کې د هغې ځلانده لمر په څېر دی چې که څه هم پخپله په ګرمۍ کې سوځي، خو کورنۍ ته رڼا او تودوخه ورکوي.
د ډاډ او خوندیتوب ډال:
پلار د عزم، همت او د کور د عزت زرین رنګ دی. د هغه شتون اولاد ته دا جرئت ورکوي چې د نړۍ له هر ډول ستونزو سره په مېړانې مقابله وکړي.
د پله نښه (لارښود):
پلار د خپل ژوند د تجربو په تېرو رنګونو د اولاد د راتلونکي لپاره داسې یوه روښانه لاره رسموي، چې هغوی په کې له تېروتنې او غورځېدو څخه خوندي پاتې شي.
که د مور دعاګانې د باران د لومړیو څاڅکو په څېر د انسان په ژوند باران وي، نو د پلار خولې د هغو غنمو دانو په څېر دي چې د ځمکې په تل کې د اولاد د ارام او سوکالۍ لپاره کرل کېږي.
د هغوی د شتون حقيقي اثر:
کوم کور چې د مور او پلار په شتون ودان وي، هلته د غریبۍ په حالت کې هم د پادشاهۍ رنګونه څرګندېږي. د مور د لاس پخ شوی ساده ډوډۍ د نړۍ تر ټولو خوندوره غذا او د پلار تر څنګ کېناستل د نړۍ تر ټولو لوی سلطنت دی. هغوی داسې عینکې دي چې موږ ته د ژوند د تریخوالي په منځ کې هم د امید او خوښۍ رنګونه راښيي.
د مور او پلار مینه پخوانۍ کېږي نه او نه یې هم رنګ پیکه کېږي. راځئ د هغوی په ژوندوني د هغوی د زړونو قدر وکړو، د هغوی په مخونو کې د موسکا رنګونه وګورو او د خپلو نېکو اخلاقو په واسطه د هغوی د زړونو پاچاهي خپله کړو، ځکه چې د نړۍ تر ټولو لویه شتمني د مور او پلار خوشحالي ده.
پای
۱۴۰۵/۳/۲۱ ھ ش
سلام
عابد صاحب دغه لنډه لیکنه کې ستا نیت ښیی چې تاهم نړۍ ته اوبیا زغم، شایسته مرغلرو چې په هیڅ نظام کې کرکه او نفرت نه منی راسپړلی هو !مور په یوه لاس زانګو او په بل لاس جهان زنګوی دیوې هوسا ټولنې لاره ، دسیپلین او اخلاق له کور څخه پیل کیږی. کور آباد.