تاند (پنجشنبه، د چنګاښ/ سرطان ۲۵ مه) د سویس د بانکي ادارې «یو بي اېس» (UBS) د ۲۰۲۶ کال د نړیوالې شتمنۍ راپور خپور کړی، چې پکې ویل شوي د شتمنو هېوادونو نړیواله درجهبندي د شتمنۍ د اندازه کولو د طریقې له مخې د پام وړ بدلېږي.
د راپور له مخې، که د هر بالغ وګړي د اوسطې شتمنۍ (Average Wealth) پر بنسټ درجهبندي وشي، نو سویس د هر بالغ وګړي لپاره د شاوخوا ۹۱۰ زره امریکایي ډالرو په لرلو سره لومړی ځای خپل کړی دی.
له سویس وروسته متحدایالتونه د شاوخوا ۶۹۶ زره ډالرو په لرلو سره دوهم او لوکزامبورګ د نژدې ۶۵۵ زره ډالرو په لرلو سره درېیم ځای لري. هانګ کانګ او سنګاپور هم د مخکښو هېوادونو په ډله کې شامل دي.
په راپور کې ویل شوي، که د منځنۍ شتمنۍ (Median Wealth) معیار وکارول شي، چې د عادي وګړي اقتصادي وضعیت ښه څرګندوي، نو نړیواله درجهبندي په بشپړه توګه بدلېږي.
د دې معیار له مخې، لوکزامبورګ د هر بالغ وګړي لپاره د شاوخوا ۳۹۴ زره ډالرو په لرلو سره لومړی مقام لري، بلجیم په کابو ۲۷۷ زره ډالرو سره دوهم دی، او له هغه وروسته استرالیا، نیوزیلنډ او ډنمارک د مخکښو هېوادونو په کتار کې راځي.
کارپوهان وایي، د اوسطې شتمنۍ پر کچه د څو ډېرو شتمنو کسانو پانګه ډېر اغېز کوي، خو د منځنۍ شتمنۍ معیار په ټولنه کې د شتمنۍ اصلي وېش او د عادي خلکو اقتصادي وضعیت په ډېر دقیق ډول څرګندوي. له همدې امله بلجیم، ډنمارک او لوکزامبورګ په دې درجهبندۍ کې لوړ ځایونه خپل کړي دي.
په راپور کې د خلیج هېوادونو وضعیت هم ارزول شوی دی. قطر د اوسطې شتمنۍ له مخې د هر بالغ وګړي لپاره د شاوخوا ۱۸۹ زره ډالرو په لرلو سره ۲۷م ځای خپل کړی، او متحده عربي امارات د نژدې ۱۵۸ زره ډالرو په لرلو سره ۲۹م ځای لري.
خو د منځنۍ شتمنۍ له مخې، قطر د هر بالغ وګړي لپاره د شاوخوا ۹۵ زره ډالرو په لرلو سره ۲۴م مقام ته رسېدلی.
د راپور په پای کې ټینګار شوی چې د یوه هېواد اقتصادي هوساینه یوازې د ټولې شتمنۍ یا د میلیاردرانو د شمېر له مخې نه شي ارزول کېدای، بلکې دا هم مهمه ده چې شتمني تر کومه بریده د عادي خلکو په منځ کې په عادلانه ډول وېشل شوې وي.