تاند (پنجشنبه د چنګاښ/سرطان ۲۵مه) د افغانستان د کرکټ چټک توپ اچوونکی چې له څه مودې راهیسې د ناروغۍ پر بستر پروت دی هند ته د درملنې لپاره ولېږدول شو.
د کرکټ بورډ ویاند سیدنسیم سادات په خپله فېسبوک پاڼه دغه خبر خپور کړی دی.
هغه لیکلي:« په خواشینۍ سره باید ووایو چې د کرکټ ځوان چټک توپ اچوونکی خلیل احمد له څه مودې راهیسې ناروغ دی. د ناروغۍ د تشخیص لپاره یې معاینات لا هم دوام لري. د کرکټ بورډ د لارښوونې او همکارۍ سره سم تر پرون ماښام د کابل په یو روغتون کې تر مراقبت لاندې و چې پرون ماښام خپله عمومي رییس میرویس اشرف یې هم پوښتنې ته ورغلی وو.»
سادات لیکلي چې،کرکټ بورډ د خلیل او د هغه کورنۍ سره د تېرو څو ورځو راهیسې تماس کې و او نن سهار یې د تشخیص او تداوۍ په موخه هند ته ولېږدوه.
نوموړی وایي چې، له خلیل احمد سره په دغه سفر کې د کرکټ بورډ د ظرفیت لوړونې څانګې یو ډاکټر هم ملتیا کوي.
سادات دا روښانه کړې نه ده چې، چټک توپ اچوونکی خلیل احمد څه ناروغي لري.
د کرکټ شنونکي هم د کرکټ بورډ دا کار یو نیک اقدام بولي او تمه لري چې، د درملنې برخه کې یې بې پروایي ونشي.