تاند(دوشنبه، د وږي/ سنبلې ۹ مه) د طالبانو د بهرنیو چارو وزیر امیرخان متقي وايي، د دوی حکومت غواړي چې له امریکا سره یې اړیکې عادي شي او دواړه لوري کولی شي خپلې اړیکې د متقابل درناوي او ګډو ګټو پر بنسټ تنظیم کړي.
متقي د جاپان له کیودو خبري اژانس سره په مرکه کې له واشنګټنه وغوښتل چې له طالبانو سره خپله «مقابله کوونکې تګلاره» بدله او د افغانستان د اوسني وضعیت ته په کتو خپله تګلاره بیا وارزوي.
هغه وویل، طالبان اوس له نورو هېوادونو سره د خپلو اړیکو پر پراختیا تمرکز کوي او د دوی د حکومت په رسمیت پېژندل «بل پړاو» دی؛ یعنې دا مهال یې سمدستي لومړیتوب نه ګڼي.
متقي زیاته کړه چې طالبان غواړي له امریکا سره اړیکې د «متقابل درناوي او ګډو ګټو» پر بنسټ پراخې کړي.
روسیه تر اوسه یوازینی هېواد دی چې د طالبانو حکومت یې په رسمیت پېژندلی دی. لوېدیځ هېوادونه بیا د نجونو د زدهکړو پر بندیز، د ښځو د کار پر مخنیوي او د بشري حقونو پر رعایتولو ټینګار کوي او دا مسایل له طالبانو سره د اړیکو د عادي کېدو مهم شرطونه بولي.
متقي د نجونو د منځنیو او لوړو زدهکړو د بیا پیل په اړه د یوې پوښتنې په ځواب کې د دې کار لپاره کومه مشخصه نېټه ونه ښوده.
د طالبانو د بهرنیو چارو وزیر همداراز د افغانستان او جاپان اړیکې «تاریخي او نژدې» وبللې او له جاپاني حکومت څخه یې وغوښتل چې په توکیو کې د افغانستان د سفارت د فعالیت د بیا پیل زمینه برابره کړي.
د روسیې له حکومت سره د طالبانو د پوځي او تخنیکي همکاریو په اړه متقي وویل، د روان کال په غبرګولي کې لاسلیک شوی هوکړه لیک د روسي وسلو د ترمیم او ساتنې لپاره دی او د ده په وینا، دا همکاري د کوم ځانګړي هېواد پر ضد نه ده.
متقي د افغانستان او پاکستان ترمنځ د اختلافونو د حل لپاره هم د خبرو اترو ملاتړ څرګند کړ.