د افغانستان په اړه د روسیې او امریکا د نه عملي شوې همکارۍ کیسه

غوث جانباز

د روسیې د لومړي تلویزیون په «لویه لوبه» خپرونه کې د دې پروګرام کوربه دمیتري سایمز او متقاعد جنرال یفګیني بوژینسکي د ۱۹۹۹ او ۲۰۰۱ کلونو ترمنځ په افغانستان کې د روسیې او امریکا د همکارۍ په اړه خبرې کړې دي.

د دوی په وینا، ولادیمیر پوتین لا په ۱۹۹۹ کال کې واشنګټن ته وړاندیز کړی و چې په افغانستان کې د ترهګرو ډلو پر ضد ګډه مبارزه وکړي. د دې وړاندیز بنسټ د شمالي ټلوالې سره د مسکو اړیکې وې؛ هغه ځواک چې وروسته په ۲۰۰۱ کال کې د امریکا تر مشرۍ لاندې د پوځي عملیاتو له پیل وروسته د لوېدیځ ائتلاف اصلي ځمکنۍ تکیه وګرځېد.

جنرال بوژینسکي ویلي، روسیې له امریکایانو سره په چټک او پراخ ډول مرسته وکړه؛ له استخباراتي معلوماتو او د ماینونو د نقشو له شریکولو نیولې، آن تر دې چې د روسیې له خاورې یې د پوځي اکمالاتو د لېږد زمینه هم برابره کړه.

خو دمیتري سایمز ادعا کړې چې واشنګټن د مسکو دغه وړاندیز ته په شکمن نظر کاته او دا یې په منځنۍ آسیا کې د روسیې د نفوذ د پراخولو هڅه بلله. د هغه په خبره، امریکايي چارواکو په سیمه کی خپلو ډیپلوماتانو ته لارښوونه کړې وه چې په سیمه کې له روسیې سره له ګډو اقداماتو واټن وساتي.

د خپرونې دواړو گډونوالو ټینګار وکړ چې د شمالي ټلوالې له ملاتړ پرته به د امریکا لپاره په افغانستان کې بریا تر ډېره ستونزمنه وه، خو واشنګټن د دوی په باور د روسیې ونډه او مرسته په لازم ډول ونه ارزوله.

یادونه: دیمیتري سایمز امریکايي ـ روسی سیاسي شنونکی او د تلویزیون کوربه دی. هغه پخوا په واشنګټن کې د «Center for the National Interest» د تحلیلي مرکز مشر و او اوس د روسیې د لومړي تلویزیون د «لویی لوبه» Great Game خپرونه پرمخ وړي.