د یوې کورنۍ او بریالۍ ټولنې راز په دې کې دی چې خپل راتلونکی نسل په سمه توګه وروزي او د هغوی لپاره د پرمختګ لارې هوارې کړي. هره ټولنه هغه وخت د پرمختګ لوړو پوړیو ته رسېږي چې د خپلو ماشومانو او ځوانانو په زدهکړه، روزنه او شخصیت جوړونه کې پانګونه وکړي. کشران د سبا مشران دي، نو د هغوی روزنه د ټولنې د روښانه راتلونکي تضمین ګڼل کېږي.
د دې لپاره اړینه ده چې له کوچنیوالي څخه پر ماشومانو او ځوانانو زدهکړې، روزنې او ښه اخلاقو ته ځانګړې پاملرنه وشي، ترڅو هغوی د خپل روښانه راتلونکي د جوړولو توان پیدا کړي. د کورنۍ غړي، ښوونکي او د ټولنې مشران هر یو په خپل ځای د دې ستر مسؤلیت برخه لري. که ماشوم په سالم چاپېریال کې لوی شي، د علم او ادب ارزښت ور وپېژندل شي او د ښه چلند روزنه ورکړل شي، نو هغه به د خپلې ټولنې یو ګټور او مسؤل وګړی شي.
که نوي نسل ته په تدریجي ډول د زده کړې، تربیې او مسؤلیت احساس وکړي ، نو مشران دې ډاډه وي چې ټولنه به یې روښانه او بریالۍ راتلونکې ولري. د کشرانو بریا یوازې د هغوی شخصي لاسته راوړنه نه ده، بلکې د هغو مشرانو د زحمت، لارښوونې او ملاتړ پایله هم ده چې د هغوی د ودې لپاره یې هڅې کړې وي.
بریالي مشران یوازې امر نه کوي، بلکې د عملي بېلګې هم وړاندې کوي. هغوی د خپلو تجربو په شریکولو، د ستونزو په حل کې د مرستې کولو او د کشرانو د استعدادونو په هڅولو سره هغوی ته د پرمختګ فرصتونه برابروي. کله چې یو ځوان د مشرانو له لوري تشویق او ملاتړ وویني، نو په ځان باور پیدا کوي او د خپلو موخو د ترلاسه کولو لپاره لا زیاتې هڅې کوي.
له بلې خوا، که کشران د بې پروايۍ، ناسمې روزنې او بې سوادۍ ښکار شي، نو نه یوازې خپله راتلونکې له ستونزو سره مخ کوي، بلکې د کورنۍ او ټولنې پر پرمختګ هم منفي اغېز پرېږدي. له همدې امله د مشرانو مسؤلیت یوازې د نن ورځې اداره نه ده، بلکې د سبا لپاره د داسې نسل روزل دي چې کورنۍ او ټولنې د خدمت اوږه ورکړي.
د یوې بریالۍ او پرمختللې ټولنې بنسټ د هغې پر روزل شوي، بااخلاقه او بااستعداده نسل ولاړه وي. هر څومره چې مشران د کشرانو په زدهکړه، روزنه، اخلاقي پالنه او ملاتړ کې زیاته ونډه واخلي، هماغومره به کورنۍ او ټولنه د سوکالۍ، یووالي او پرمختګ پر لور ګامونه اخلي.
لیکوال: شاه زلمی
نېټه: ٢٠٢٦ د جولای ١٤مه