تاند (شنبه، د چنګاښ/ سرطان ۲۰ مه) د هرات د سوداګرۍ او پانګونې خونې ویلي، د روان لمریز کال په لومړۍ ربعه کې له هرات ولایت څخه ۱۱۷ ټنه تازه مېوه د اسیا، عربي هېوادونو او د سیمې یو شمېر بازارونو ته صادره شوې ده.
دې خونې په یوه خبرپاڼه کې ویلي، دغه صادرات د افغانستان د کرنیزو محصولاتو پر دوامدارې نړیوالې غوښتنې دلالت کوي او ښيي چې په صادراتو کې د هرات رول مخ په ډېرېدو دی.
د هرات د سوداګرۍ او پانګونې خونې چارواکو ویلي:
«د سوداګریزو لارو ښه کول او نړیوالو بازارونو ته د لاسرسي پراخول د کرنیزو صادراتو د زیاتوالي لپاره مهم لومړیتوبونه دي.»
دوی هیله څرګنده کړې چې د راتلونکو حاصلاتي موسمونو په ترڅ کې، د تولید له زیاتېدو سره به د کرنیزو محصولاتو د صادراتو کچه هم نوره لوړه شي.
کرنیز صادرات د افغانستان د بهرنۍ سوداګرۍ او د کلیوالو سیمو د اقتصادي فعالیتونو له مهمو سرچینو څخه ګڼل کېږي.