تاند (یکشنبه د چنګاښ/سرطان ۷مه) د افغانستان د بدن ښکلا او فټنس فدراسیون ویلي، چې د هېواد د بدن ښکلا او فټنس ملي لوبډله بوتان ته ولاړه.
دغه لوبډله به د سوېلي اسیا د اتلولۍ د ۱۶م پړاو سیالیو کې ګډون وکړي.
د افغانستان د بدن ښکلا او فټنس فدراسیون نن پر خپل فېسبوک پاڼه زیاته کړې چې، د دې سفر موخه د سویلې اسیا د ۱۶م پړاو سیالیو کې ګډون دی او افغان لوبډله به د بوتان پلازمېنې «تیمفو» کې ښکته شي.
دغه فدراسیون زیاته کړې چې، په دغو سیالیو کې به د افغانستان له لوري ۱۵ ورزشکاران ګډون وکړي.
د یادولو ده چې د سوېلي اسیا د اتلولۍ سیالۍ د جون په ۳۰مه په تیمفو کې پيلېږي.
د بدن ښکلا او فټنس ورزش په وروستیو کلونو کې په افغانستان کې د پام وړ پرمختګ کړی او افغان ورزشکارانو په بېلابېلو نړیوالو او سیمهییزو سیالیو کې د مډالونو په ګټلو سره د هېواد لپاره ویاړونه خپل کړي دي.
د سوېلي اسیا اتلولۍ هم د دې ورزش له مهمو سیمهییزو سیالیو څخه شمېرل کېږي، چې د سیمې د بېلابېلو هېوادونو ورزشکاران پکې خپل ځواک او وړتیا ازموي.