تاند (چهارشنبه، د چنګاښ/ سرطان ۳ مه) چین د سوپرکمپیوټرونو په برخه کې ستره بریا ترلاسه کړې او له امریکا څخه یې د نړۍ د تر ټولو ځواکمن سوپرکمپیوټر مقام خپل کړی دی.
د چین نوی سوپرکمپیوټر «لاین شاین» د نړۍ د ۵۰۰ غوره سوپرکمپیوټرونو په درجهبندۍ کې لومړی ځای خپل کړی، چې ورسره په دې برخه کې د امریکا اوږدمهاله برلاسي پای ته رسېدلې ده.
دا بریا ځکه هم ځانګړې ګڼل کېږي چې چین دغه ماشین په بشپړه توګه د خپلې کورنۍ ټکنالوژۍ پر بنسټ جوړ کړی دی. د امریکا له بندیزونو سره سره، چینایي انجنیرانو د خپلو تولید شوو چیپونو، سافټویر او شبکيزو سیسټمونو په کارولو سره ثابته کړې چې هېواد یې د پرمختللې ټکنالوژۍ په برخه کې د ځانبساینې پر لور په چټکۍ روان دی.
چین وروستی ځل په ۲۰۱۷ کال کې د نړۍ تر ټولو د ځواکمن سوپرکمپیوټر لقب ترلاسه کړی و، خو هغه مهال په کارول شوې ټکنالوژۍ کې ځینې بهرنۍ برخې هم شاملې وې. دا ځل وضعیت توپیر لري او دا پرمختګ د چین د ټکنالوژیکې خپلواکۍ یوه مهمه نښه بلل کېږي.
د راپورونو له مخې، په دغه سوپرکمپیوټر کې د Huawei لهخوا جوړ شوي چیپونه او کورني شبکيز تجهیزات کارول شوي دي. سوپرکمپیوټرونه د عادي کمپیوټرونو پرتله خورا ځواکمن وي او د زرګونو پروسسورونو په مرسته ډېرې پېچلې علمي، طبي او صنعتي محاسبې ترسره کوي.
تر دې وړاندې د امریکا سوپرکمپیوټر El Capitan د نړۍ تر ټولو ځواکمن سوپرکمپیوټر ګڼل کېده او شاوخوا ۱۸ میاشتې یې لومړی مقام ساتلی و. خو د نوې درجهبندۍ له مخې، د چینایي ماشین د پروسس سرعت ۲.۲ اېکسا فلاپس ته رسېدلی، په داسې حال کې چې امریکایي سوپرکمپیوټر ۱.۸ اېکسا فلاپس وړتیا لري.
دا پرمختګ نه یوازې د سوپرکمپیوټرونو په نړیواله سیالۍ کې د چین برلاسی ښيي، بلکې د چین او امریکا ترمنځ د روانې ټکنالوژیکې سیالۍ یو مهم پړاو هم بلل کېږي.