تاند (سه شنبه د چنګاښ/سرطان ۲مه) د راپورونو له مخې په تېرو ۵ ورځو کې ایران پنځه افغانان اعدام کړي دي.
تازه هه نګاو د ایران د بشري حقونو سازمان پرون وویل چې، ایران ۳ افغانان د ایران په بېلابېلو زندانونو کې اعدام شوي دي.
ههنګاو زیاته کړې وه چې، ایران د میرویس خلیلزاد او ابراهیم احمدشاهي په نوم دوه افغانان د نشهيي توکو د جرمونو بېلابېلو قضیو په تړاو د شېراز په عادلاباد زندان کې اعدام کړي دي.
د راپور له مخې؛ ۵۵ کلن میرویس خلیلزاد د جلالاباد او ۴۴ کلن ابراهیم احمدشاهي د خوست ولایت اوسېدونکی و.
تر دې څو ساعته وروسته یاد سازمان په یوه بل راپور کې ویلي چې، د یزد په مرکزي زندان کې د نورجلال مجاهد په نوم یو ۲۷کلن ځوان د نشهیي توکو اړوند جرم په تور اعدام کړی دی.
دغه راز د سرچینې د یوه بل راپور له مخې؛ ایران د تېر غبرګولي میاشت په ۳۱مه د سیستان او بلوچستان په زابل مرکزي زندان کې د همایون نورزي په نوم یو بل افغان چې ۷۰ کاله عمر یې لاره، د نشهیي توکو اړوند جرم په تور اعدام کړی دی.
هه نګاو د تېر غبرګولي میاشت په ۲۸مه ویلي چې، ایراني چارواکو د عبدالله جلالي په نوم یو ۲۵ کلن افغان وګړی د نشهیي توکو اړوندو جرمونو په تور د زاهدان په مرکزي زندان کې اعدام کړی دی.
د یاد سازمان د شمېرو له مخې؛ د ۲۰۲۶کال له پیل راهیسې ایران لږترلږه ۱۲ افغان بندیان د ایران په زندانونو کې اعدام کړي دي.
دغه سازمان وړاندې ویلي و، چې ایران یوازې په تېر ۲۰۲۵کال کې ۸۵ افغانان اعدام کړي دي.