تاند (یکګشنبه، د غبرګولي/ جوزا ۳۱ مه) د افغانستان او قزاقستان د سوداګرۍ او اقتصادي فورم په ترڅ کې، د دواړو هېوادونو خصوصي سکتورونو د همکارۍ ۲۵ لاسلیک کړل.
د اسلامي امارت د صنعت او سوداګرۍ وزارت د معلوماتو له مخې، دغه قراردادونه د درملو، سبزیجاتو، تازه او وچو مېوو، اوړو، غنمو، غوړیو، کچالو او بانکي خدماتو په برخو کې لاسلیک شوي دي.
وزارت ویلي چې دا قراردادونه به د افغانستان او قزاقستان ترمنځ اقتصادي همکاري پیاوړې او سوداګریزې اړیکې لا پراخې کړي.
دا هوکړې د درې ورځني سوداګریز فورم او نندارتون په ترڅ کې اعلان شوې چې پکې د اسلامي امارت د صنعت او سوداګرۍ وزیر نورالدین عزیزي او د قزاقستان د صدراعظم او د ملي اقتصاد وزیر سیرک ژومانګارین هم ګډون درلود.
د طالبانو د سوداګرۍ وزارت ویلي چې له ۲۰۲۲ کال راهیسې د افغانستان او قزاقستان ترمنځ دوهاړخیزه سوداګري کابو دوه برابره شوې او یوازې په تېر یوه کال کې شاوخوا ۴۱ سلنه زیاتوالی پکې راغلی دی.
دواړو لورو د داسې یوې تګلارې په اړه هم خبرې کړې چې له مخې یې کلنۍ سوداګري ۳ میلیارده ډالرو ته لوړه شي.
قزاقستان په وروستیو کلونو کې د منځنۍ آسیا له مهمو اقتصادي شریکانو څخه ګرځېدلی او افغانستان ته د غنمو او اوړو د صادرولو ترڅنګ یې د ترانسپورټ، لوژستیک، کرنې او پانګونې په برخو کې هم همکارۍ پراخې کړې دي.