تاند (چهارشنبه د غبرګولي/ جوزا ۲۶مه) د افغانستان او هندوستان د کرکټ ملي او الف لوبډلې نن چهارشنبه د سیالۍ په ډګر کې سره مخامخ دي.
لومړۍ لوبه د هند، افغانستان او سرېلانکا ترمنځ د درې اړخیزه سریز یوه برخه ده.
دغه لوبه د افغانستان د الف او هند الف لوبډلو ترمنځ د سهار په ۹ بجو پيلږي. تر دې وړاندې بیا افغان الف لوبډلې په لومړۍ لوبه کې هند الف لوبډلې ته په ۴ منډو ماتې ورکړې وه.
د افغانستان او هند دکرکټ ملي لوبډلو ترمنځ بیا د غرمې په ۱۲ نیمو بچو دوهمه یو ورځنۍ لوبه پيلېږي.
دا د درې یو ورځنیو لوبو د لړۍ دوهمه لوبه ده.
افغان کرکټ ملي لوبډلې په لومړۍ لوبه کې د هند د کرکټ له ملي لوبډلې ماتې وخوړه. په یاده لوبه کې د افغانستان پيلېز توپوهونکي رحمان الله ګربز د هند خلاف سلیزه جوړه کړې وه.
افغان کرکټ مینه وال تمه لري چې، ملي او الف لوبډلې به په نننیو لوبو کې مقابلې لوبډلې ماتې کړي او بری به د افغانستان په برخه کړي.
خو کرکټ پوهان بیا مقابلو لوبډلو ته په کتو د سختو لوبو اټکل کوي.
دوی وایي، هندي لوبډلې کمزوري سیالان نه دي او باید افغان لوبډله په یوه پياوړي پلان د هند خلاف میدان ته ښکته شي.