تاند (شنبه د غبرګولي/ جوزا ۲۴مه) د ملګرو ملتونو د بشري چارو د همغږۍ دفتر(اوچا) وايي چې سویډن له افغانستان سره نږدې ۳ میلیونه ډالر مرسته وکړه.
اوچا نن(یکشنبه) په خپله ویبپاڼه دغه خبرپاڼه خپره کړې ده.
اوچا لیکلي چې، سویډن ۲۸ میلیونه سویډني کرونر، چې شاوخوا ۲.۹۹ میلیونه ډالر معادل دي، د افغانستان د بشري مرستو صندوق ته ځانګړي کړي دي.
سرچینې ویلي چې، دا مرسته به د افغانستان په بیلابیلو برخو کې د بشري بحرانونو لپاره د سمدستي غبرګونونو پیاوړتیا کې مرسته وکړي او مرستندویه ادارو ته به اجازه ورکړي چې په لنډ وخت کې بیړنیو اړتیاوو ته ځواب ووایی.
اوچا دا مرسته “سخاوتمندانه” بللې او د سویډن حکومت څخه یې په افغانستان کې د بشري پروګرامونو لپاره د دوامداره ملاتړ لپاره مننه کړې ده.
ملګري ملتونه وايي چې سږکال په افغانستان کې ۲۲ میلیونه خلک بشري مرستو ته اړتیا لري او تر دې وړاندې یې په افغانستان کې د بشري وضعیت د حل لپاره د ۱.۷۱ میلیارد ډالرو مرستې غوښتنه کړې وه.