له جرمني څخه افغانستان ته د افغان کډوالو د وړلو مخه ونیول شوه

د افغانستان او جرمني د دولتونو ترمنځ به فعلا کوم حقوقي یا سیاسي نزاکت وي ، خو اصلي ستونزه په ټوله اروپا کې د مېشتو افغانانو ده . هغوی چې د مهاجرو په حیث رسما قبول شویدي او کله چې افغاني کاغذونو او اسنادو ته ضرورت ورته پیدا شي ، لکه د وکالت خط ، نکاح خط ، پاسپورت ، د زېږون تصدیقونه ، د هغو کسانو لپاره چې په اروپا کې وفات کیږي او دوستان یا خپلوان یې غواړي ، د هغوی جنازې وطن ته انتقال کړي، وراثت خطونه ، حصروراثت او نورو اسنادو ته د ضرورت په وخت کې تش په نوم افغان سفارتونو ته مراجعه وکړي ، هغوی له یوې خوا رسمیت نه لري ، له بلې خوا هلته ټول متعصب ، منفور ، مفسد او د یوې خاصې ډلې کسان ناست وي . دوی هغه اسناد چې په کابل او هېواد کې ترتیب شوي وي ، نه قبلوي او مراجعین مجبوروي ، چې په سفارت کې نور جوړ کړي ، دوی د هر سند په مقابل کې له رسمي نرخ نه څو وارې زیات حق الصکوک اخلي او په پای کې د دوی اسناد هیچا او هېڅ مرجع ته د قبول وړ نه وي .
همدا ډول د دغو تش په نوم سفارتونو له خوا ترتیب شوي اسناد بیا په کابل کې هم نه منل کیږي اوهلته بیا هغوی وایی ، دا اسناد مونږ نه منو. دا سفارتونه نورافغانستان کې رسمیت نه لري .
بنا د ستونزو د حل لپاره که په ټوله اروپا کې له سیاسي نزاکتونو ورهاخوا یو څو سفارتونه چې کارمندان یې دواړو خواو یعني مقیم هېوادونو او د کابل لپاره منلو وړ وي ، پرانیستل شي ، ترڅو د مهاجرو ستونزې حل او آسانتیاوي راولي . حتمي به نه وي چې له کابل نه ورته طالبان خپل ملایان را واستوي ، کیدای شي ، په اروپا کې محلي کارمندان او یا نور د باور وړ او مسلکي کسان دا مسوولیت په غاړه واخلي .
په دنهاګ کې موجود افغان سفارت تر یوځایه له مراجعینو سره مرسته کوي ، خو دوی ، تیلیفون ته ځواب نه ورکوي ، آنلاین وخت نیول هم ډېر ستونزمن دی .
یوازې په بن کې افغان جنرال قونسلګري رښتینه همکاري کوي ، خو د مراجینو د زیاتوالي له امله باید اوږد وخت ورته انتظار وکړل شي.