تاند (یکشنبه، د غبرګولي/ جوزا ۳ مه) د افغان سوداګرو، صادروونکو او د خصوصي سیکتور د استازو ۱۰۰ کسیز پلاوی د اقتصادي او سوداګریزو همکاریو د پراختیا لپاره پرون (شنبې) ازبکستان ته لاړ.
د افغانستان د سوداګرۍ او پانګونې خونې ویلي چې دغه پلاوی د آرین زړګي عظیمي په مشرۍ د نمنګان ښار ته تللی دی.
د دې ادارې د معلوماتو له مخې، د دواړو هېوادونو ترمنځ د سوداګریزو اړیکو پراختیا، د ګډو پانګونو د فرصتونو ارزونه، او د خصوصي سیکټور ترمنځ د صادراتو او وارداتو زیاتوالی د دې سفر له مهمو موخو څخه ګڼل کېږي.
د افغانستان د سوداګرۍ او پانګونې خونې زیاته کړې چې د دې پلاوي غړي به د خپل سفر په ترڅ کې له ازبکستاني چارواکو او سوداګرو سره وویني او خبرې اترې وکړي.
دغه سفر په داسې حال کې کېږي چې په وروستیو میاشتو کې د افغانستان د واکمن رژیم او د منځنۍ اسیا هېوادونو، په ځانګړي ډول ازبکستان، ترمنځ سوداګریزې اړیکې پراخې شوې دي.