د ط د حکومت جګپوړو چارواکو له مولانا فضل الرحمان سره د مولاناادریس پر وژل کېدو خواخوږي څرګنده کړه

تاند (شنبه، د غويي/ ثور ۱ ۹مه) د طالبانو د حکومت مشرانو د جمعې په ورځ د جمعیت علمای اسلام (ف) له مشر مولانا فضل‌الرحمان سره اړیکه ونیوله او د شیخ ادریس د وژل کېدو په تړاو یې خواخوږي څرګنده کړه.

پاکستاني رسنیو نن (شنبې) راپور ورکړ چې د جمعیت علمای اسلام د رسنیو څانګې ویلي چې د افغانستان دفاع وزیر ملا یعقوب، د کورنیو چارو وزیر سراج‌الدین حقاني، د بهرنیو چارو وزیر امیرخان متقي او ویاند ذبیح‌الله مجاهد په جلا جلا ډول له مولانا فضل‌الرحمان سره خبرې کړې دي.

د خبرو پر مهال، طالب مشرانو د شیخ ادریس پر وژل کېدو ژوره خواشیني څرګنده کړې او د هغه روح ته یې دعا کړې ده.

مولانا ادریس، چې د جمعیت علمای اسلام (ف) یو مخکښ غړی و، د مې میاشتې په پنځمه نېټه د چارسدې د عثمانزو په سیمه کې هغه مهال د موټرسایکل سپرو وسله‌والو له خوا ووژل شو چې یوې مدرسې ته روان و.

د داعش خراسان څانګې (ISKP) د دې برید مسوولیت ومانه، او وروسته پاکستان ادعا وکړه چې دا برید په افغانستان کې پلان شوی و.

له بلې خوا، په اسلام‌اباد کې د جمعیت علمای اسلام (ف) غړو د مولانا ادریس د وژنې پر ضد لاریون وکړ او د پېښې د عاملانو د ژر تر ژره نیولو غوښتنه یې وکړه.

دا لاریون د اسلام‌اباد د جمعیت علمای اسلام د مشر مفتي اویس عزیز په مشرۍ ترسره شو، چې پکې د ګوند ګڼو مشرانو او غړو ګډون کړی و.

د لاریون پر مهال د ګوند مرکزي ویاند اسلم غوري وویل، تر هغو چې د مولانا ادریس قاتلان ونه نیول شي، اوسنی حکومت به د هغه د وژنې مسؤول ګڼل کېږي.

هغه وویل، جمعیت علمای اسلام یوه سوله‌ییزه سیاسي ډله ده چې تل یې د سولې او ثبات ملاتړ کړی دی.

اسلم غوري زیاته کړه چې د مولانا ادریس وینه به بې‌ځایه نه ځي او ادعا یې وکړه چې اوس په پاکستان کې د هیچا ژوند، مال او عزت خوندي نه دی.

هغه د امنیتي ادارو پر دوامداره ناکامیو هم نیوکه وکړه او ویې ویل چې خلک نور د دغو ناکامیو د زغملو توان نه لري.

دا احتجاجونه داسې مهال کېږي چې د مولانا ادریس د وژل کېدو له امله په جمعیت علمای اسلام کې پراخه غوسه راپارېدلې او ګوند د هېواد په بېلابېلو سیمو کې د نورو مظاهرو اعلان هم کړی دی.