تاند (سه شنبه د ثور/ غويي ۱۵مه) ننګرهار کې د طالبانو د کرنې، اوبو لګولو او مالدارۍ ریاست مسوولان وایي چې، سږ کال د دغه ولایت په ۲۲ ولسوالیو کې پر ۲۰۲۱.۵ جریبه ځمکه د شفتالو باغونه کرل شوي دي.
د مسوولانو د اټکل له مخې له دغو باغونو څخه به سږکال شاوخوا ۱۱ زره او ۳۲۰ مټریک ټنه حاصل ترلاسه شي.
د یاد ریاست د مالوماتو پر اساس تېر کال پر ۱۹۹۱.۵ جریبه ځمکه شفتالان کرل شوي وو، چې ترې ۱۱ زره او ۲۲۳.۳۴ مټریک ټنه حاصل ترلاسه شوی و.
دوی زیاتوي، د شفتالو د حاصلاتو راټولولو، بسته بندۍ او نورو اړوندو برخو کې زرګونو هېوادوالو ته په مستقیم او غیر مستقیم ډول د کار زمینه هم برابره شوې ده.
همدارنګه د ننګرهار د شفتالو حاصلات د هېواد نورو ولایتونو ته هم لېږدول کېږي.
مسؤلان وایي، په ننګرهار کې د شفتالو بېلابېل ډولونه کرل شوي، چې د کیفیت له پلوه د نورو هېوادونو له شفتالو څخه غوره دي او په مناسب وخت کې حاصل ته رسېږي.