تاند (یکشنبه، د غويي/ ثوز ۱۳ مه) د ملګرو ملتونو د ماشومانو د ملاتړ ادارې، یونسیف ویلي چې پلان لري په ۲۰۲۶ کال کې په افغانستان کې د سختې خوارځواکۍ له امله کړېدونکي شاوخوا ۱.۳ میلیونه ماشومان تداوي کړي، ځکه چې هېواد له یوه ژورېدونکي بشري کړکېچ سره مخامخ دی چې میلیونونه خلک یې اغېزمن کړي دي.
دې ادارې ویلي چې د درملنې دا پروګرام به په ټول هېواد کې د اسیايي پراختیايي بانک په ملاتړ پلی شي، او موخه یې دا ده چې په تر ټولو په زیانګالو ټولنو کې ژوند ژغورونکو تغذیوي خدمتونو ته پراختیا ورکړي.
د ملګرو ملتونو چارواکو خبرداری ورکړی چې دا مهال په افغانستان کې له درې میلیونو څخه ډېر ماشومان د حادې خوارځواکۍ له خطر سره مخامخ دي، او دا شمېر د تېر کال پرتله زیات شوی، چې لامل یې د اقتصادي ستونزو او د خوړو د نهخوندیتوب خراب وضعیت بلل کېږي.
ادارې ویلي چې د اړتیاوو دا کچه د یوې پراخې بشري بېړنۍ وضعې څرګندونه کوي، چې فقر، محدود روغتیايي خدمات، او د جګړو او اقتصادي کمزورۍ دوامداره اغېزې یې اصلي لاملونه دي.
یونیسف زیاته کړې چې تېر کال یې شاوخوا ۶۱۰ زره ماشومان د سختې خوارځواکۍ له امله درمل کړي وو، خو ټینګار یې کړی چې اوسنۍ اړتیا تر شته امکاناتو ډېره ده او بېړنۍ نړیوالې مالي مرستې او دوامداره ملاتړ ته اړتیا لري.
مرستندویې ادارې خبرداری ورکوي چې که مداخلې پراخې نه شي، نو بشري وضعیت به نور هم خراب شي او میلیونونه ماشومان به د ناروغیو، د اوږدمهاله ودې ستونزو او حتی د مرګ له خطر سره مخامخ شي.
افغانستان دا مهال د نړۍ یو له سختو بشري کړکېچونو څخه تجربه کوي، چې پراخ فقر، د خوړو کمښت، او بنسټیزو خدماتو ته محدود لاسرسی د خلکو لویه برخه اغېزمنه کړې ده.
بشري بنسټونه وايي چې ماشومان تر ټولو ډېر اغېزمن دي، ځکه کمزوری شوی روغتیايي نظام او اقتصادي ستونزې د ضروري تغذیې، درملنې او وقایوي خدماتو لاسرسی محدود کړی دی.