اشا بوسلي (Asha Bhosle) د هندي موسیقۍ له هغو افسانوي څېرو څخه ده چې څو لسیزې یې د بالیووډ او هندي موسیقۍ نړۍ ته ځانګړی رنګ ورکړی دی. د هغې غږ، تنوع، او اوږد هنري مزل هغه د نړۍ د سترو سندرغاړو په کتار کې درولې ده.
د ژوند پیل او کورنۍ شالید
اشا بوسلي د ۱۹۳۳ کال د سپتمبر په ۸مه په Sangli ښار کې وزېږېده. هغه د یوې هنري کورنۍ غړې وه. پلار یې دینانانت منګېشمر Dinananth Mangeshkar یو نامتو کلاسیک سندرغاړی او د تیاتر لوبغاړی و.
اشا د لتنا منګشکر، چې د هند افسانوي سندرغاړې وه، کشره خور ده. د دوی کورنۍ په هنر او موسیقۍ کې ژوره سابقه لري.
له ستونزو ډک ماشومتوب
کله چې اشا یوازې ۹ کلنه وه، پلار یې ومړ. له همدې امله یې کورنۍ له سختو اقتصادي ستونزو سره مخامخ شوه. اشا او د هغې خور لتا مجبورې شوې چې د ژوند د دوام لپاره کار پیل کړي.
اشا ډېر په تنکي عمر کې د سندرو په ویلو پیل وکړ، خو په پیل کې یې ډېرې ستونزې درلودې، ځکه چې هغه د خپلې خور تر سیوري لاندې پاتې وه او ورته د دوهم درجې سندرغاړې په سترګه کتل کېدل.
هنري پیل او پرمختګ
اشا بوسلي خپل هنري ژوند د ۱۹۴۰مو کلونو په پای کې پیل کړ. په لومړیو کې هغې ته کم اهمیته سندرې ورکول کېدې. خو ورو ورو یې خپل ځانګړی سبک جوړ کړ.
د هغې په شهرت کې لوی بدلون هغه وخت راغی کله چې هغې له نامتو موسیقار O. P. Nayyar سره کار پیل کړ. دې همکارۍ اشا ته ځانګړی هویت ورکړ.
زرین پړاو او شهرت
اشا بوسلي په ځانګړي ډول په ۱۹۶۰ او ۱۹۷۰ لسیزو کې ډېر شهرت ترلاسه کړ. له هغې سره بل مشهور موسیقار R. D. Burman همکاري وکړه، چې وروسته یې د ژوند ملګری هم شو.
د هغې په بېلابېلو سبکونو کې سندرې ویلي: لکه کلاسیک، پاپ، قوالي، فلمي او غزل.
په ټولو برخو کې مشهورې شوې.
هنري ځانګړتیاوې
اشا بوسلي د خپلې انعطاف منونکي غږ له امله ځانګړې ده. هغې کولی شول رومانتيکې سندرې، مستي سندرې، غمجنې، ژورې او احساساتي غزلې او حتی عصري او د لویدیځ په سبک سندرې په ډېر مهارت ووایي.
نړیوال شهرت
اشا بوسلي یوازې په هند کې نه، بلکې د افغانستان په شمول په نړیواله کچه هم پېژندل شوې ده. هغې په ګڼو ژبو سندرې ویلي دي، لکه:هندي، اردو، بنګالي، پنجابي، انګلیسي او نورو ژبو.
د هغې سندرې په نړۍ کې میلیونونه اورېدونکي لري.
واده او شخصي ژوند
اشا بوسلي په لومړي سر کې له ګنپاتراو بوسلي سره واده وکړ، خو دا واده بریالی نه و او وروسته سره جلا شول.
وروسته هغې له موسیقار ار. ډي بورمن R. D. Burman سره واده وکړ، چې دا اړیکه یې د ژوند مهمه برخه وه.
جایزې او بریاوې
اشا بوسلي د خپل هنري ژوند په اوږدو کې ګڼې جایزې ترلاسه کړې، لکه:
- د فلم فېیر جایزې
- ملي هنري جایزې
- نړیوالې ستاینې
هغې ته د هند د دولت له خوا لوړ افتخاري نښانونه هم ورکړل شوي دي.
اوږد هنري مزل
اشا بوسلي له شپږو لسیزو زیات وخت په موسیقۍ کې فعاله پاتې شوې ده. دا هغه څه دي چې ډېر لږ هنرمندانو دومره ډېره موده هنري فعالیت ته بې وقفې دوام ورکړی دی.
اشا بوسلي یوازې یوه سندرغاړې نه ده، بلکې د هندي موسیقۍ یوه ژوندۍ افسانه ده. د هغې ژوند د مبارزې، زحمت، او بریا کیسه ده. هغې وښوده چې که انسان هڅه وکړي، نو له ستونزو سره سره هم کولی شي د نړۍ په کچه نوم پیدا کړي.