تاند (شنبه د وري – حمل ۲۲مه) ننګرهار کې د طالبانو د حکومت د کرنې اوبو لګولو او مالدارۍ رئيس مولوي عبدالستار محمد وايي، سږ کال د ننګرهار په ۴ ولسواليو کې پر ۴۰۶ جریبه ځمکه ځمکني توتان کرل شوي دي.
محمد وایي چې، د اټکل له مخې به سږکال ۶۷۰ مټريک ټنه حاصل ورکړي.
نوموړی وايي، دغه کرنه په سره رود، خوګیاڼو، کوټ او دره نور ولسواليو کې شوې او د تېر کال په پرتله د کرکچه او حاصل زيات شوی دی.
د طالبانو دکرنې رئيس ځمکني توتان د کوکنارو مناسب بديل بولي او زياتوي چې بزګرانو ته د کرنې اوبولګولو او ناروغيو کنټرول په برخو کې روزنې ورکړل شوي دي.
ننګرهار کې بزګران هم د ځمکني توتانو له حاصل او عايد څخه خوښ دي او د کوکنارو ښه بديل يې بولي.
دوی وایي، سږکال یې بازار هم ځکه ښه دی چې، له پاکستان سره لارې تړلي او پاکستاني توتان بازار ته نه راځي.