تاند (سې شنبه، د وري/ حمل ۱۸ مه) د طالبانو د بهرنیو چارو وزیر د سېشنبې په ورځ په چین کې د افغانستان او پاکستان ترمنځ خبرو ته محتاطانه خوشبیني څرګنده کړه او ویې ویل چې «رغنده» خبرې روانې دي چې هدف یې له اسلاماباد سره د تاوتریخوالي کمول دي.
امیر خان متقي په کابل کې د چین له سفیر ژاو شینګ سره په کتنه کې، وویل چې په ارومچي ښار کې روانې خبرې تر اوسه ګټورې وې او باید د کوچنیو اختلافاتو له امله له خنډ سره مخامخ نه شي.
د طالبانو د بهرنیو چارو وزارت په یوه خبرپاڼه کې همداراز ویلي چې ښاغلي متقي له چین څخه د خبرو د کوربتوب مننه وکړه او د سیمې د نورو هېوادونو لکه سعودي عربستان، ترکیې، قطر او متحده عربي امارات د منځګړیتوب هڅې یې وستایلې.
هغه یو ځل بیا ټینګار وکړ چې طالبان د خبرو له لارې د ستونزو حل ته ژمن دي او خپل دریځ یې دفاعي وباله چې هدف یې د افغانستان د خاورې ساتنه ده.
د چین سفیر وویل چې بېجینګ هڅه کوي د دواړو خواوو ترمنځ باور جوړ کړي او دا خبرې یې د بېطرفۍ او همکارۍ پر بنسټ پیل کړې دي، او هیله یې څرګنده کړه چې دا بهیر به له تاوتریخوالي پرته دوام ومومي.
اصلي اختلافات لا هم پاتې دي
سره له دې مثبتو څرګندونو، لا هم مهم اختلافات شته. پاکستان غواړي چې د افغانستان د طالبانو حکومت د تحریک طالبان پاکستان ډله په رسمي ډول ترهګره اعلان کړي او په افغانستان کې یې جوړښتونه له منځه یوسي.
دا غوښتنه د اسلاماباد د دریځ مهمه برخه ده.
پاکستان له اوږدې مودې راهیسې پر طالبانو تور لګوي چې د TTP جنګیالیو ته یې په افغانستان کې د فعالیت اجازه ورکړې، خو طالبان دا ادعا ردوي.
طالبانو تر ډېره د خبرو جزییات نه دي څرګند کړي، خو د بهرنیو چارو وزارت مرستیال نعیم وردګ ویلي چې د خبرو پایله به د پاکستان په چلند پورې اړه ولري، او ټینګار یې کړی چې ستونزې له ډیپلوماتیکو لارو حل کېدای شي.
د خبرو بهیر او روان وضعیت
د ارومچي خبرې اوس شپږمې ورځې ته داخلې شوې دي، خو لا هم دواړو خواوو د پرمختګ په اړه مهم جزییات نه دي خپاره کړي.
دا خبرې په داسې حال کې کېږي چې له فبرورۍ راهیسې د دواړو هېوادونو ترمنځ نښتې روانې دي، چې پکې هوايي بریدونه او د توپونو او هاوانونو تبادله هم شامله ده.
سره له دې چې خبرې روانې دي، د پاکستان له لوري د افغانستان پر ختیځو ولایتونو لا هم بریدونه کېږي، چې له کبله یې یو شمېر کورونه ویجاړ شوي او زرګونه کورنۍ د خپلو مېنو پرېښودو ته اړ شوې دي.
پخوانۍ خبرې چې په دوحه، استانبول او سعودي عربستان کې شوې وې، دایمي پایلې ته ونه رسېدې، نو اوس دا پوښتنه راپورته شوې چې ایا دا ځل به خبرې کومه مهمه نتیجه ولري که نه.