تاند (پنجشنبه، د زمري/ اسد ۲۹ مه) هند د افغانستان له روغتیايي سکتور سره د خپلو بشري مرستو په دوام، په کابل کې یوه روغتون ته طبي توکي رسولي او یو ځل بیا یې له افغان ولس سره د بشري ملاتړ پر دوام ټینګار کړی دی.
د اې این آی د راپور له مخې، د هند له لوري کابل ته د طبي مرستې د افغانستان د روغتیايي اړتیاوو د پوره کولو لپاره استول شوې دی. په دې مرسته کې روغتیايي او طبي توکي شامل دي چې د کابل روغتون ته سپارل شوي دي.
د اژانس پر اساس، هند په دې اقدام سره یو ځل بیا څرګنده کړې چې د افغانستان له خلکو سره د روغتیا او بشري مرستو په برخو کې خپل ملاتړ ته دوام ورکوي. د طبي توکو رسول د هغو مرستو یوه برخه بلل کېږي چې هند یې په وروستیو کلونو کې له افغان ولس سره د بشري اړتیاوو د پوره کولو لپاره ترسره کوي.
هند تر دې وړاندې هم په ځلونو افغانستان ته راز راز واکسینونو په شمول طبي مرستې لېږلې دي.
افغانستان له اوږدې مودې راهیسې د روغتیايي خدمتونو، درملو او طبي تجهیزاتو له کمښت سره مخ دی. په ځانګړي ډول په روغتیايي مرکزونو کې د درملو او اړینو طبي توکو اړتیا د نړیوالو بشري مرستو د دوام غوښتنه ډېره کړې ده.
د هند دا تازه مرسته داسې مهال کېږي چې په افغانستان کې روغتیايي مرکزونه د مالي سرچینو، درملو، تجهیزاتو او مسلکي روغتیايي خدمتونو له محدودیتونو سره مخ دي.
هند په تېرو کلونو کې افغانستان ته د درملو، واکسینونو، طبي تجهیزاتو او نورو بشري توکو مرستې استولې دي او ټینګار یې کړی چې له افغان ولس سره به په بشري برخه کې خپل ملاتړ ته دوام ورکړي.