تاند (دوشنبه، د وري/ حمل ۱۷ مه) د ایران د پارلمان (اسلامي شورا) ريیس محمدباقر قالیباف د یکشنبې په ورځ د ډونالډ ټرمپ د هغو ګواښونو په ځواب کې، چې د سېشنبې د ورځې د خبرو د ناکامېدو په صورت کې د ایران پر برېښناکوټونو او پلونو د برید خبره کړې وه، خبرداری ورکړ چې دا اقدام به «ټوله سیمه په اور کې وسوځوي».
هغه، چې تېره اوونۍ د امریکا ولسمشر د ایران له لوري د خبرو استازی بللی و، همداراز په ایکسپاڼه کې ولیکل چې د ټرمپ «بېاساسه حرکتونه» به «امریکا د هرې امریکايي کورنۍ لپاره په ریښتیني دوزخ بدل کړي».
قالیباف له امریکا څخه وغوښتل چې دا «خطرناکه لوبه» پای ته ورسوي.
دا په داسې حال کې ده چې ایران د یکشنبې په ورځ د بحرین، متحده عربي اماراتو او کویټ د انرژۍ زیربناوې په نخښه کړې دي.
له بلې خوا، ډونالډ ټرمپ ایران ته ضربالاجل ټاکلی چې د امریکا د ختیځ په وخت د سېشنبې تر ماښامه پورې دې هرمزتنګی پرانیزي.
خو هغه په عین وخت کې هیله ښودلې چې د واشنګټن او تهران ترمنځ په روانو خبرو کې ښايي تر دوشنبې پورې یوه هوکړه وشي.