تاند (یکشنبه د وري – حمل ۱۶مه) افغانستان کې د طالبانو د حکومت د مشر د نوي فرمان پر بنسټ، اداري او اصولي اسنادو کې د بهرنیو اصطلاحاتو د ارزونې او بدلون لپاره یوه ځانګړې کمېټه جوړېږي.
په یاد فرمان کې راغلي چې دا کمېټه به د عدلیې وزارت تر مشرۍ لاندې فعالیت کوي او غړي به یې د د لوړو زده کړو وزارت، د پوهنې وزارت، د اطلاعاتو او کلتور وزارت، همدارنګه د علومو اکاډمي او د اداره امور استازي وي.
د فرمان د دوهمې مادې له مخې، ټولو دولتي ادارو ته سپارښتنه شوې چې په خپلو اداري او اصولي اسنادو کې کارېدونکي بهرني اصطلاحات راټول او د مناسب بدیل او دلایلو سره یو ځای، د جدول په بڼه یادې کمېټې ته وسپاري.
د درېیمې مادې له مخې، کمېټه مکلفه ده چې لېږل شوي اصطلاحات وڅېړي او د اسلامي او افغاني اصطلاحاتو په پام کې نیولو سره، مناسب او مستند بدیلونه وټاکي او د وروستي تأیید لپاره وړاندې کړي.
په فرمان کې کمېټې ته دا واک ورکړل شوی چې، د اړتیا په صورت کې د اړوندو ادارو استازي د لا زیاتو معلوماتو لپاره راوغواړي.
د فرمان د څلورمې مادې له مخې، دا حکم د صادرېدو له نېټې څخه نافذ ګڼل کېږي او ټاکل شوې چې په رسمي جریده کې هم خپور شي.