تاند (یکشنبه، د وري/ حمل ۱۶ مه) د افغانستان د طالبانو د باندنیو چارو وزارت په نوښت، د «افغانستان–منځنۍ اسیا د مشورتي ډیالوګ» غونډه نن (یکشنبه) په کابل کې جوړېږي.
د باندنیو چارو وزارت د خبرپاڼې پر اساس، دا غونډه به د بهرنیو چارو وزیر امیر خان متقي په مشري ترسره شي، او د افغانستان او منځنۍ اسیا هېوادونو جګپوړي استازي به پکې ګډون وکړي.
په دې ناسته کې به سیاسي، اقتصادي او امنیتي موضوعات، او همداراز د سیمهییزې همکارۍ، سوداګرۍ او ترانزیت د پراختیا په اړه به خبرې وشي.
په خبرپاڼه کې نه دي ویل شوي چې د منځنۍ اسیا د کومو هیوادونو استازي په دې ناسته کې ګډون کوي.