تاند (سې شنبه، د وري/ حمل ۱۱ مه) پاکستان نن د افغان کډوالو د ستنولو په هدف د تورخم دروازه یو وار بیا پرانیسته.
په ننګرهار کې طالب چارواکو هم تایید کړه چې د تورخم دروازه د کډوالو پر مخ بېرته پرانېستل شوې ده. خو پاکستان تراوسه پورې په دې اړه لا څه نه دي ویلي.
د ننګرهار د اطلاعاتو او کلتور رياست د اطلاعاتو آمر قريشي بدلون ويلي چې دا لاره نن سېشنبه (۱۱ حمل) يوازې هغو کډوالو ته پرانیستل شوې چې له پاکستان څخه افغانستان ته راستانه کېږي.
د تورخم دروازه د تېرې اوونۍ د پنجشنبې په ورځ هم د کډوالو د ستنېدو لپاره پرانیستل شوې وه، خو له یوې نښتې وروسته چې یو پاکستانی سرتېری پکې ټپي شو، د پاکستان له لوري وتړل شوه.
د افغانستان او پاکستان ترمنځ د تګ راتګ لارې، چې تورخم هم پکې شامل دی، له څو مياشتو راهيسې د ترانزيټ او د مسافرو د تګ راتګ پر مخ بندې دي.