تاند (یکشنبه د وري – حمل ۹مه) په هرات کې افغان سوداګرو د ایران د وروستیو جګړو له امله زیانمنو خلکو سره د مرستې لپاره ۱۵ مېلیونه افغانۍ راټولې او د ایران کونسلګرۍ ته وسپارلې.
د هرات د سوداګرۍ او پانګونې خونې رییس محمد یونس قاضي زاده وایي، دغه مرسته د ایران په وروستیو جګړو کې د زیانمنو کسانو د ملاتړ، انساني خواخوږۍ او د ګاونډیتوب حق ادا کولو لپاره شوې ده.
قاضي زاده د مرستو د سپارلو پرمهال ویلي چې، نن یې ۱۵ مېلیونه افغانۍ په هرات کې د ایران کونسلګرۍ ته د ایران د خلکو لپاره ورکړې او په خبره یې دغه مرستې به دوام ولري او هڅه کوي چې، د هرات او افغانستان مرستې له ایران سره دایمي شي.
هرات کې د ایران کونسل علي رضا مرحمتي هم د دغه مرستو هرکلی کړی.
هرات کې افغان سوداګر وایي، دغه مرستې د دواړو هېوادونو د خلکو ترمنځ د یووالي او متقابل ملاتړ نښه او ټینګار کوي چې، په سختو حالاتو کې باید د سیمې خلک یو د بل تر څنګ ودرېږي.
دغه مرستې په داسې مهال کېږي چې، ایران اوس هم له اسرائیلو او امریکا سره د جګړې په ډګر کې ښکېل دی او د دغې جګړې له امله ایرانیانو سخت مالي او ځاني زیان لیدلی دی.
په ورته مهال افغانستان او پاکستان هم له تېرې څه باندې یوې میاشتې راهیسې په جګړه کې دي.