تاند (جمعه، د وري/ حمل ۷ مه) د افغانستان لپاره د روسیې د ولسمشر ځانګړي استازي ضمیر کابلوف، ویلي چې روسیه په افغانستان کې د امریکا د پوځي تأسیساتو د بیا ځای پر ځای کېدو او همداراز بګرام هوايي اډې ته د بېرته ستنېدو احتمال «په بشپړه توګه د منلو وړ نه ګڼي».
هغه یادونه وکړه چې د ډونالډ ټرمپ حکومت پر له پسې د بګرام هوايي اډې د بېرته ترلاسه کولو غوښتنه کړې ده.
ضمیر کابلوف د روسیې خبري اژانس ریانووستي ته ویلي:
«موږ د امریکا او ناټو د پوځي اډو او زیربناوو جوړول، که په افغانستان کې وي او که د هغه په ګاونډیو هېوادونو کې، په هره پلمه، په بشپړه توګه د نه منلو بولو.»
د روسیې د ولسمشر استازي هیله څرګنده کړه چې طالبان به «همداسې دریځ ته ژمن پاتې شي.»
د امریکا ولسمشر ډونالډ ټرمپ، د ۱۴۰۴ کال د سنبلې په میاشت کې ویلي و:
«موږ هڅه کوو چې د بګرام هوايي اډه بېرته ترلاسه کړو.»
همداراز په ملګروملتو کې د امریکا استازي مایک والتز، مخکې د ایران د جګړې پر مهال ویلي وو:
«کاشکې موږ لا هم د بګرام هوايي اډه درلودای.»