تاند (پنجشنبه د وري – حمل ۶مه) له اوږده ځنډ وروسته نن ماسپښین له پاکستان څخه سلګونه افغان کډوال د تورخم له لارې هېواد ته راستانه شول.
د معلوماتو له مخې، په ستنو شویو کې شاوخوا ۲۰۰۰ هغه کسان شامل دي چې د پاکستان له زندانونو تازه ازاد شوي دي.
دا کسان د جبري ستنېدنې د بهیر برخه دي چې د طالبانو او پاکستان ترمنځ د شوي کړکېچ له کبله یې هېواد ته تګ ستونزمن شوی و.
له یوې میاشتې ډېره موده وشوه چې تورخم لار د کډوالو دتګ راتګ پر وړاندې تړل شوې وه چې له کبله یې ګڼ شمېر افغان کورنۍ له فرضي کرښې پورې غاړې پر سړکونو انتظار وو.
د طالبانو او پاکستان ترمنځ د روان کړکېچ شاوخوا شپږ میاشتې پوره کیږي خو لاهم داسې حل نه دی لټول شوی چې دواړو غاړو ته جګړه ودروي.
څو ورځې وړاندې، د افغانستان او پاکستان عالمانو په ګډ لیک کې له دواړو هېوادونو غوښتنه وکړه چې روان اوربند دې تر لوی اختر پورې وغځول شي.
د دې غوښتنې په غبرګون کې پرون چهارشنبه د طالبانو ویاند ذبیحالله مجاهد وویل چې د جګړې پیل پاکستان کړی او د اوربند او یا د هغه د ماتولو پرېکړه به هم پاکستان کوي.