تاند (پنجشنبه د وري – حمل ۶مه) په افغانستان کې د طالبانو د حکومت د ټولګټو وزارت وایي چې تېره اوونۍ د اوسپنې پټلۍ له لارې ۱۶۹ زره ۵۶۵ مټریک ټنه نفتي، غیرنفتي او نور مواد انتقال شوي دي.
یاد وزارت کې د طالبانو د حکومت ویاند محمد اشرف حقشناس په خپله اېکس پاڼه لیکلي چې، په دې اندازه کې د حیرتان بندر له لارې ۱ لیک ۸۰ زره ۸۵ ټنه، د آقینې بندر له لارې۱۸ زره ۵۳۱ ټنه، د تورغونډۍ بندر له لارې ۲۰ زره ۹۰۱ ټنه او د خواف–هرات له لارې ۲۲ زره ۴۷ ټنه انتقالات شوي دي.
د سرچینې د خبرپاڼې له مخې چې د انتقالاتو له ډلې یوه برخه صادرات دي.
سرچینه وایي چې، په تېره اوونۍ کې ۱۲۶۲ ټنه صادرات شوي، چې لويه برخه یې وچه مېوه او د انارو جوس دي.
اقتصادي کارپوهان وایي، هر څومره چې د اوسپنې پټلۍ له لارې د صادراتو او انتقالاتو کچه لوړيږي، په هماغه اندازه کاري فرصتونه برابریږي، ملي عواید زياتيږي او په ټوله کې اقتصادي ثبات او ځان بسياينې ته لاره هواریږي.
د حقشناس په وینا، دوی د لا زیاتو انتقالاتو لپاره د مناسبو شرایطو برابرولو او سوداگرو ته د اسانتیاوو چمتو کولو هڅه کوي،څو د ملي عوايدو د زياتوالي په موخه پر رېللار د سوداګریزو توکو د لیږد-رالیږد بهیر روان او چټک وساتي.