تاند (چهارشنبه د وري – حمل ۵مه) افغانستان کې د طالبانو د ترانسپورت او هوایي چلند وزارت د هوا پېژندنې ادارې سبا پنجشنبه د هېواد په ۱۶ ولایتونو کې د ورښت او سېلابونو اټکل کړی دی.
یادې ادارې په جوزجان، سرپل، فاریاب، هرات، فراه، غور، نیمروز، هلمند، کندهار، زابل، روزګان، دایکنډي، پکتیکا، غزني، سمنګان او بغلان ولایتونو کې د ورښت اټکل کړی دی.
د طالبانو د هوا پېژندنې ادارې د اټکل له مخې، د یادو ولایتونو په بېلابېلو سیمو کې به د باران کچه له ۱۰ تر ۴۰ ملي مترو پورې وي او همداراز زیاتوي چې، په سویلي او لوېدیځو ولایتونو کې د تېزو بادونو د پېښېدو اټکل هم شته.
د اټکل له مخې د یادو ولایتونو په بېلابېلو سیمو کې به د باد سرعت په یو ساعت کې له ۵۰ تر ۸۰ کیلو مترو پورې وي.
د یادونې ده چې نن چهارشنبه هم د هېواد یو شمېر ولایتونو کې باران ورېږي او په کندهار کې د سېلابونو د راوتلو خبرونه هم ورکړل شوي دي.
کروندګر بیا سږنیو ورښتونو ته خوښ دي او دا ډول دوامدار ورښتونه د آباد کال لپاره مهم بولي.