تاند (جمعه، د کب/ حوت ۱۵ مه) د افغانستان له لوري پر پاکستان د بې پېلوټه الوتکو د بریدونو په اړه د پاکستان د اندېښنو له ډېرېدو وروسته د پنجاب حکومت اعلان کړی چې د صوبې په ټولو ولسوالیو کې به د ډرون ضد (Anti-Drone) ځانګړي جزوتامونه جوړ شي، څو د ډرون الوتکو د بریدونو مخه ونیول شي.
دا پرېکړه د پنجاب اعلیٰ وزیرې مریم نواز تېره اوونۍ تصویب کړه. هغې ټینګار وکړ چې چارواکي باید یوازې د ترهګریزو پېښو له رامنځته کېدو وروسته غبرګون ونه ښيي، بلکې مخکې له مخکې د مخنیوي اقدامات هم وکړي.
د پلان مهم ټکي
- د هرې ولسوالۍ د فضایي څارنې لپاره به د بې پېلوټه الوتکو ځانګړی واحد/ قطعه وکارول شي.
- د ډرون ضد سیستم به نصب شي چې مشري به یې د ولسوالۍ د پولیسو افسر کوي.
- د ډرونونو او د هغوی د مخنیوي وسایل به د هرې ولسوالۍ د اړتیاوو له مخې برابر شي.
د پنجاب ایالت د کورنیو چارو ریاست ویلي چې د فضایي څارنې او د خلکو د خوندیتوب لپاره د پولیسو وړتیا لوړېږي، او په ټول پنجاب کې د ۱۴۴مې مادې له مخې محدودیتونه نافذ دي.
د یادونې وړ ده چې د افغانستانله لوري د بې پېلوټه الوتکو له کامیابو او په عین حال کې د پاکستان لپاره له غیرمتوقع بریدونو وروسته په ټول پاکستان کې د بې پیلوټه الوتکو پر الوزولو بندیز لګول شوی دی. پنجاب
خو دا بندیز د کوچنیو ډرونونو په داخلي فعالیتونو او همدارنګه د استخباراتي او قانون پلي کوونکو ادارو پر ډرونونو نه عملي کېږي.
د فوربس پر اساس بې پېلوټه الوتکې د پاکستان خلاف څومره اغېزمنې دي.؟