تاند (یکشنبه، د کب/ حوت ۳ مه) د افغانستان لپاره د امریکا پخواني ځانګړي استازي زلمی خلیلزاد د یکشنبې په ورځ پر افغانستان د پاکستان هوايي بریدونه په کلکه وغندل.
هغه وویل چې په دغو بریدونو کې ګڼ شمېر بېګناه ښځې، ماشومان او بوډاګان وژل شوي او ټپیان شوي دي.
خلیلزاد په پاکستان کې له اوږدې مودې راهیسې ناسمې حکومتدارۍ، د لږکیو په حقونو کې لاسوهنې، په انتخاباتي بهیر لاس وهنې او پرلهپسې پوځي کودتاوو ته اشاره وکړه او ویې ویل چې د روان وضعیت اصلي ریښې همدلته پرتې دي.
هغه دا وضعیت د پاکستان او د هغه د ګاونډیو هېوادونو لپاره یوه تراژیدي وبلله او د پاکستان له مشرانو یې وغوښتل چې خپلې تګلارې له سره وارزوي او خپله لاره بدله کړي.
د پاکستان له لوري په بمباري شویو سیمو کې شاهدان وايي چې لسګونه بېګناه ماشومان، ښځې او نارینه وژل شوي دي خو د پاکستان د کورنیو چارو مرستیال وزیر طلال چودري «جیو نیوز» ته وویل چې په دغو بریدونو کې لږ تر لږه ۷۰ وسلهوال وژل شوي، خو هغه د دې ادعا لپاره کوم شواهد وړاندې نه کړل او نه یې په دې اړه څه وویل چې څرنګه ده ته څرګنده شوه چې په یوه بل هیواد کې د شپې په بمبارۍ کې دقیقاً ۷۰ تنه او هغه هم د پاکستان د حکومت وسله وال مخالفان وژل شوي دي.