تاند (یکشنبه، د کب/ حوت ۳ مه) د پاکستان حکومت ادعا وکړه چې د یکشنبې په سهار یې د افغانستان پولې ته نژدې په بریدونو کې لږ تر لږه ۷۰ وسلهوال وژلي دي.
د پاکستان د کورنیو چارو مرستیال وزیر ادعا وکړه چې دا بریدونه پر هغو ځایونو شوي چې د پاکستاني وسلهوالو پټنځایونه وو.
دا په داسي حال کې ده چې په بمباري شویو سیمو کې شاهدان وايي، د پاکستان په بمباریو کې د ښځو او ماشومانو په شمول ملکي افغانان وژل شوي دي.
د پاکستان د کورنیو چارو مرستیال وزیر طلال چودري «جیو نیوز» ته وویل چې په دغو بریدونو کې لږ تر لږه ۷۰ وسلهوال وژل شوي، خو هغه د دې ادعا لپاره کوم شواهد وړاندې نه کړل او نه یې په دې اړه څه وویل چې څرنګه ده ته څرګنده شوه چې په یوه بل هیواد کې د شپې په بمبارۍ کې دقیقاً ۷۰ تنه او هغه هم د پاکستان د حکومت وسله وال مخالفان وژل شوي دي.
وروسته د پاکستان دولتي رسنیو راپور ورکړ چې په دغو بریدونو کې د وژل شویو وسلهوالو شمېر ۸۰ ته لوړ شوی دی.
د افغانستان دفاع وزارت په یوه اعلامیه کې ویلي چې د افغانستان په ختیځو ولایتونو ننګرهار او پکتیکا کې «بېلابېلې ملکي سیمې» په نښه شوې دي، چې پکې یوه دیني مدرسه او د ملکي وګړو ګڼ کورونه هم شامل دي. دغه وزارت دا بریدونه د افغانستان د هوايي حریم او ملي حاکمیت ښکاره سرغړونه بللې ده.
تر دې وړاندې د افغان حکومت ویاند ذبیحالله مجاهد په اېکسپاڼه (X) کې لیکلي و چې په دغو بریدونو کې «لسګونه کسان وژل شوي او ټپیان شوي، چې ښځې او ماشومان هم پکې شامل دي.»
په ننګرهار کې د افغاني سره میاشت ټولنې ولایتي مشر مولوي فضلالرحمن فیاض وویل چې ۱۸ کسان وژل شوي او یو شمېر نور ټپیان دي.
د کنډوالو پاکول او د وژل شویو ښخول
د افغانستان د بهرنیو چارو وزارت په کابل کې د پاکستان سفیر احضار کړ او د پاکستاني بریدونو په اړه یې د احتجاجلیک ورسپارلی دی. وزارت په خپله اعلامیه کې ویلي چې د افغانستان د خاورې ساتنه د اسلامي امارت «شرعي مسوولیت» دی او خبرداری یې ورکړی چې د دغسې بریدونو د پایلو مسوولیت به د پاکستان پر غاړه وي.
د یکشنبې په سهار د ننګرهار په یو شمېر سیمو کې خلک لیدل کېدل چې له هوايي بریدونو وروسته یې کنډوالې پاکولې، او د وژل شویو کسانو د جنازو لپاره چمتووالی نیول کېده. حبیبالله، چې د سیمې یو قومي مشر دی، وویل چې په بریدونو کې وژل شوي کسان وسلهوال نه وو. هغه اسوشیټېډ پرېس ته وویل:
«هغوی بېوزله خلک وو چې ډېر یې کړېدلي دي. وژل شوي کسان نه طالبان وو، نه پوځي کسان، او نه هم د پخواني حکومت غړي. هغوی د کلي ساده ژوند درلود.»
د پاکستان د اطلاعاتو وزیر عطاالله تارړ په اېکس کې لیکلي چې پوځ د «استخباراتي معلوماتو پر بنسټ محدود عملیات» ترسره کړي او د پاکستاني طالبانو (TTP) او د هغوی د ملګرو اووه کمپونه یې په نښه کړي دي. هغه زیاته کړه چې د داعش یوه څانګه هم په نخښه شوې ده.