تاند (پنجشنبه، د سلواغې/ دلوې ۳۰ مه) د سرطان په درملنه کې کیموتراپي یو اغېزمن میتود دی، خو ورسره ګڼ منفي عوارض هم تړلي وي؛ لکه زړه بدوالی، کانګې، د ویښتانو تویېدا، د خولې زخمونه، شدیده ستړیا او عصبي ستونزې. د متخصصانو په وینا، اوس داسې اغېزمنې لارې شته چې دا عوارض د پخوا پرتله ډېرې کمې کړي.
د کیموتراپي اغېزې:
د کیموتراپي په ترڅ کې د سرطاني حجرو تر څنګ ځینې سالمې حجرې هم اغېزمنېږي، لکه د کولمو د داخلي پوښ حجرې او هغه حجرې چې د ویښتانو له ودې سره تړاو لري.
د وینې د سپینو حجرو د کموالي له امله د بدن دفاعي سیستم کمزوری کېږي، چې له امله یې د انتان او التهاب خطر لوړېږي. ځینې درمل د نیوروپتي سبب کېږي، چې درد، بېحسي او د توازن ستونزې رامنځته کولی شي.
د منفي عوارضو د کمولو اغېزمنې لارې:
- د زړه بدوالي او کانګو لپاره د زړهبدوالي ضد(Anti-nausea) درملو کارول
- د زړه بدوالي، ستړیا او د خولې د زخمونو لپاره په خوړو کې بدلون راوستل
- د ستړیا د کنټرول لپاره سپک بدني فعالیت او د ښه خوب عادتونه خپلول
- د کیموتراپي اړوند درد لپاره د درد کموونکو درملو کارول
- د ناروغ د نښو نښانو له مخې د ډاکټر تر لارښوونې لاندې مناسبه تګلاره غوره کول
دودیزې او بدیلې لارې:
څېړونکي داسې لارې لټوي چې د کیموتراپي منفي عوارض لا نور هم کم کړي.
د ادرک یا زنجبیل په څېر ځینې بوټي یا ایکیوپنکچر د عوارضو د نسبي کمولو لپاره تر څېړنې لاندې دي.
یوګا که څه هم کله ناکله د بندونو او عضلو لږ درد رامنځته کولی شي، خو په ټوله کې د عمومي روغتیا د ښه کېدو او د ستړیا په کمولو کې مرسته کوي.
د څېړونکو په وینا، کیموتراپي لا هم د سرطان د درملنې تر ټولو اغېزمنه لاره ده، خو د نوې او دودیزو لارو په مرسته یې منفي عوارض تر ډېره کمولی شو، څو د ناروغ د ژوند کیفیت ښه شي.