تاند ( دوشنبه د سلواغې ـ دلوې ۲۷مه) په بلخ ولایت کې د شاوخوا ۸ میلیون ډالرو په پانګونې د مالګې د تولید او پروسس نوې فابریکه پرانیستل شوه.
د دغه ولایت د صنعت او سوداګرۍ مسوولان وایي چې، دغه کارخونه به هره ورځ ۲۴۰ ټنه مالګه تولیدوي، او د هېواد د مالګې اړتیاوو پوره کولو کې به اغېزناک رول ولري.
په ورته مهال ځایي اوسېدونکي هم د دې کارخونې جوړېدو ته خوښ او په یاد ولایت کې د ورته نورو پانګونو غوښتنه کوي.
بلخ یو له هغو ولایتونو دی چې له تېرو کلونو راهیسې پکې له پراختیایي او پرمختیایي اړخه پرمختګونه تر سترګو کېږي.
کارپوهان په دې باور دي چې په هېواد کې د کورنیو او بهرنیو پانګوالو پانګونه افغانستان له اقتصادي بحران ژغوري او اقتصادي حالت ورسره ښه کېږي.