تاند ( یکشنبه د سلواغې ـ دلوې ۲۶مه) د طالبان د امربالمعروف وزارت ویاند، ملا سیف الرحمن خیبر ویلي چې په تېرو دوو لسیزو کې ویلنټاین یا د عاشقانو ورځ دومره دود شوه چې ګڼ افغان ځوانان یې نمانځي.
هغه ویلي: “مسلمان ځوان او پېغله دا ورځ نمانځي.، خو له خپل پلار او مور دا پوښتنه هم نه کوي چې، آیا تاسو هم دا ورځ نمانځله؟ او آیا دا ورځ زموږ له ارزښتونو، دیني اوامرو او اخلاقي نظام سره کوم تړاو لري؟”
نوموړي ویلنټاین د غرب د تقلید او د کمزورې اخلاقي فضا محصول بللی او زیاته کړې ده چې،د مینې، عاطفې او انساني ارزښتونو لپاره د یوې ورځې ټاکل سم تعبیر نه شي کېدای.
خیبر ویلي چې رښتینې مینه، اخلاق او انساني کرامت باید د انسان د ټول ژوند برخه وي، نه د یوې ځانګړې ورځې.
طالبانو له تېرو څو کلونو راهیسې د دغې ورځې پر عامه نمانځنې بندیزونه لګولي او اجازه نه ورکوي چې خلک د میینانو د ورځې ډالۍ، ګلان او نور اړوند توکي په عامو ځایونو کې وپلوري یا وپېري.
دغه راز طالبانو په افغانستان کې د نوروز په ګډون د یو شمېر نورو ورځو نمانځنه هم ممنوعه اعلان کړې دي.