تاند (یکشنبه د سلواغې ـ دلوې ۱۹مه) د طالبانو د حکومت مرستیال ویاند ملا حمد الله فطرت د ملکي وګړو د مرګ ژوبلې په اړه د یوناما راپور واقعیت وباله.
فطرت ویلي، وخت ناوخت د پاکستان پوځ له لوري د ډیورنډ کرښې په اوږدو کې ملکي وګړي په نښه شوي، چې ښکاره بېلګه یې په پکتیکا کې پر کرکټ لوبغاړو هوايي برید و.
کابل کې د ملګرو ملتونو سیاسي استازولۍ یا یوناما په خپل تازه راپور کې ویلي، په تیر ۲۰۲۵ کال کې د پاکستان پوځ بریدونو له امله ۶۱۳ ملکي وګړو ته مرګ ژوبله اوښتې ده.
د یوناما په راپور کې راغلي چې، دا په تیرو ۱۵ کلونو کې د پاکستان له لوري افغان ملکيانو ته تر ټولو درنه مرګ ژوبله ده.
د راپور موندنې ښيي چې، یواځې د تیر ۲۰۲۵ کال په ورستیو دریو میاشتو کې د پاکستان پوځ بریدونو کې ۷۰ ملکي وګړي وژل شوي او ۴۷۸ نور ټپيان دي.