تاند (شنبه، د سلواغې/ دلوې ۱۸ مه) د امریکا د هارورډ پوهنتون ډاکټرانو په یوه څېړنه کې څرګنده کړې چې هر ورځ د لبنیاتو خوړل د کولمو د سرطان خطر کمولای شي. د نوې څېړنې له مخې، سهار مهال د مستو خوړل د کولمو ګټورې باکتریاوې پیاوړې کوي او د کولمو د سرطان خطر په څرګند ډول کموي.
په امریکا کې د ځوانانو په منځ کې د کولمو د سرطان پېښې په چټکۍ سره زیاتېږي، او اټکل کېږي چې له ۲۰۱۰ وروسته تر ۲۰۳۰ پورې به د هغو کسانو شمېر، چې په دې ناروغۍ اخته کېږي، نژدې دوه برابره شي.
د ناروغۍ د زیاتېدو د لاملونو د موندلو لپاره متخصصان پراخې څېړنې کوي. له نظریو څخه یوه دا ده چې د کولمو په داخلي سطحه کې د زیانمنو باکتریاوو اوږدمهاله موجودیت د سرطاني حجرو وده چټکوي. خو د هارورډ پوهنتون ډاکټرانو موندلې چې هغه کسان چې لږ تر لږه په اوونۍ کې دوه ځله مستې خوري، په هغوی کې د باکتریاوو له امله د غټې کولمې د سرطان خطر تر ۲۰ سلنې پورې کمېږي.
څېړونکو د غټې کولمې هغه سرطاني تومورونه وڅېړل چې د «بیفیدوباکټیریم» په نوم باکتریا له امله رامنځته کېږي. دا باکتریا عموماً د فایبر په هضم او د انتاناتو په مخنیوي کې مرسته کوي.
خو که د دې باکتریا شمېر له اندازې زیات شي، نو د غټې کولمې التهاب رامنځته کوي، چې حجرې زیانمنوي او هغوی بېنظمې ودې ته هڅوي، او په پایله کې د سرطان سبب کېدای شي.