تاند ( پنجشنبه د سلواغې ـ دلوې ۱۶مه) د طالبانو د اطلاعاتو او فرهنګ وزارت ویاند خبیب غفران ویلي، چې روسیې د کازان ښار د اقتصادي، فرهنګي او ګرځندوی فورم لپاره د طالبانو د اطلاعاتو او فرهنګ وزیر شېراحمد حقاني ته د ګډون رسمي بلنه ورکړې ده.
خبیب غفران زیاته کړې، چې په مسکو کې د افغانستان د اطلاعاتو او فرهنګ وزارت فرهنګي اتشې فضلالهادي حمزه د روسیې فدراسیون د کلتور وزارت له یو شمېر چارواکو سره لیدلي دي.
نوموړی وایي، چې د یادې لیدنې پر مهال د روسیې د کلتور وزارت د هنرونو او ولسي نوښتونو د ملاتړ څانګې مرستیال د کازان ښار د اقتصادي، فرهنګي او ګرځندوی فورم لپاره د طالبانو د اطلاعاتو او فرهنګ وزیر ته رسمي بلنه ورکړې.
خبیب غفران ویلي، په دغه ناسته کې روسي لوري د دواړو خواوو ترمنځ د همکاریو پر پراختیا ټینګار کړی دی.
دغه راز روسیې افغانستان ته د خپل لوړپوړي پلاوي د سفر لېوالتیا هم څرګنده کړې ده.