تاند ( شنبه د سلواغې ـ دلوې ۱۱مه) د بلوچستان په مرکز کوټه او یو شمېر نورو ښارونو کې له نن سهار راهیسې د چاودنو او ډزو راپورونه ورکړل شوي، چې له امله یې مرګژوبله هم اوښتې ده.
د رسنیو د راپورونو له مخې پاکستاني پولیسو ویلي، په کوټه ښار کې د یوه برید له امله دوه پولیس وژل شوي دي.
چارواکي وایي، د سهار له شاوخوا شپږو بجو راهیسې په بېلابېلو سیمو کې د ډزو او چاودنو غږونه اورېدل کېږي.
بل لورته د پاکستان د ترهګرۍ ضد ځواک ویلي، د کوټې په سریاب سړک سیمه کې د عملیاتو پر مهال څلور شکمن وسله وال وژلي دي.
دغه راز د بلوچستان د پسني له سیمې راپورونه وایي،چې شپږ بریدګر، چې یوه ښځینه هم پکې شامله وه، هغه مهال ووژل شول چې، غوښتل یې د موټر بم په وسیله یوې امنیتي ودانۍ ته ننوځي. په دې پېښه کې د پاکستان د سمندري امنیتي ادارې یو پوځي هم وژل شوی دی.
بل لورته بلوڅ ازادي غوښتونکي غورځنګ (BLA) اعلان کړی چې په بلوچستان کې یې د “هېروف” عملیاتو تر نامه لاندې بریدونه پیل کړي دي.
د دغه غورځنګ مشر بشیر زیب بلوچ په یوه ویډیويي پیغام کې د دې عملیاتو د دویم پړاو د پیل خبر ورکړی او له بلوڅ ښځو او سړیو یې غوښتي چې، د پاکستان پوځ پر ضد راپورته شي.
د پاکستان پوځ تر اوسه په دې تړاو څه نه دي ویلي.
د یادونې وړ ده چې دا عملیات وروسته له هغې پیل شوي، چې وړمه ورځ په بلوچستان کې د پاکستان پوځ جلا عملیاتو کې ۴۱ وسله وال وژلي وو.
دا داسې ښکاري چې ټانډ اوس د پاکستان د پوځ لپاره کار کوي. تاسو هغه ټول پروپاګند خپروئ چې د پاکستان ISI او خونړی پوځ یې خپرول غواړي. که تاسو سم او باوري خبرونه نه لرئ، مهرباني وکړئ استازیتوب مه کوئ او د پاکستان د پوځ ویاند مه جوړېږئ.
په هغه زړور برید کې چې د زړورو بلوچ د ازادۍ غورځنګ له خوا ترسره شو، له ۳۵ څخه ډېر د پاکستان د پوځ افسران ووژل شول او د هغوی ۶ بد مرکزونه وسوځول شول، په داسې حال کې چې یوازې ۵ ازادي غوښتونکي جنګیالي ووژل شول.