تاند ( شنبه د سلواغې ـ دلوې ۱۱مه) د افغانستان-پاکستان د سوداګرۍ ګډې خونې له کابل او اسلام اباده غوښتي چې، هغو ۱۰زرو کانټینرونو ته یواځې د یو ځل تګ اجازه ورکړي چې د لارو تړل کېدو له امله له شاوخوا ۱۰۰ ورځو راهیسې په بندرونو کې بند پاتې دي.
د دغې خونې غړي وایي، د یادو کانټینرونو بیا صادرات به درانه مالي زیان واړوي او دا زیان ۷۵ میلیونو ډالرو ته رسیږي.
له شاوخوا ۱۰۵ ورځو راهیسې د سوداګرۍ بندښت افغان صادرونکو ته ۲۳۳ میلیون ډالره او افغان واردونکو ته هم نږدې ۱۲۶ میلیونه ډالره زیان رسولی دی.
د یادې خونې رییس خانجان الکوزی ټینګار کوي چې د دواړو هېوادونو د خصوصي سکټور له لوري د دغو توکو د خوشې کولو هڅې دوام لري.
الکوزی زیاتوپ چې اوس حکومتونه باید عمل وکړي او ستونزه حل کړي.
الکوزی داسې مهال دا څرګندونې کوي چې، بل لورته د خیبر پښتونخوا مالي او اداري مسوولانو هم ویلي چې، افغانستان سره د سوداګرۍ تر بندېدو وروسته یې عواید کم شوي او دندې یې له منځه ځي.
دوی هم په لوړه کچه د لارو د خلاصون لپاره د غونډې د رابللو غوښتنه کړې ده.