تاند ( شنبه د سلواغې ـ دلوې ۱۱مه) د خېبرپښتونخوا مالي مسوولانو فدرالي حکومت ته خبرداری ورکړی چې له افغانستان سره د سوداګرۍ بندېدو له امله عواید کم شوي او دندې یې له منځه ځي.
پاکستاني رسنیو ویلي، د خیبرپښتونخوا مالي چارو سلاکار مزمل اسلم د فدرالي سوداګرۍ وزیر جام کمال ته په لیک کې دغه خبر ورکړی دی.
دوی ویلي، د پاکستان-افغانستان لارې له تړل کېدو وروسته د کرښې دواړه غاړې سوداګري په بشپړه توګه درېدلې ده.
هغه د لوړې کچې غونډې د رابللو غوښتنه کړې.
کابو څلور میاشتې په تېرېدو دي چې، د افغانستان او پاکستان ترمنځ د اړیکو د ترینګلتیاوو له امله هر ډول سوداګري بنده ده.
دغه سوداګري لومړی پاکستان بنده او بیا یې پر افغانستان برید وکړ خو وروسته افغان لوري هم د دغه برید د ځواب ترڅنګ له پاکستان سره سوداګري بنده او سوداګرو ته یې وویل چې، بدیلې لارې ومومي.
افغان سوداګر وایي، اوس یې بدیلې لارې موندلې او تر ډيره د پاکستان له انحصاره هم خلاص شوي دي.