تاند(جمعه، د سلواغې/ دلوې ۱۰ مه) د طالبانو ویاند ذبیحالله مجاهد، د پنجشنبې په ورځ په یوه مرکه کې وویل چې اساسي قانون یوه نوې پدیده ده، او د هبتالله اخندزاده پر فرمانونو په ټینګار سره یې وویل چې د طالبانو اداره اساسي قانون ته اړتیا نه لري.
مجاهد د افغان تلویزیون د دې پوښتنې په ځواب کې چې ولې په تېرو څلورو کلونو کې افغانستان اساسي قانون نه لري، وویل: «قرآن او شریعت زموږ قانون دی.»
هغه زیاته کړه چې دا مهال تر سلو ډېر فرمانونه د طالبانو د مشر، هبتالله اخوندزاده، د توشیح (لاسلیک) په تمه دي.
مجاهد وویل چې په تېره یوه پېړۍ کې د اساسي قانون جوړول دود شوي، خو باید د اسلامي نظامونو تاریخ ته هم پام وشي. نوموړي ټینګار وکړ: «موږ شریعت او قرآن لرو.»
خو ده په عین حال کې د اساسي قانون د لرلو د اهمیت ته اشاره وکړه، ویې ویل: «دا ډېر ښه کار دی چې یوه کتابچه او څو مادې ولرو، څو د ټولو لپاره روښانتیا او شفافیت رامنځته کړي.»
د طالبانو ویاند ټینګار وکړ چې په اوسني نظام کې خپلسري او د طالبانو د مشرانو تر منځ اختلاف نه شته. هغه وویل: «هغه څه چې امیرالمؤمنین یې ووایي، فرمان دی او عملي کېږي. تر اوسه داسې کوم فرمان نه دی صادر شوی چې د شریعت خلاف وي، او دا فرمانونه د قوانینو په توګه په رسمي جریده کې چاپ او خپرېږي.»
هغه په پای کې وویل: «موږ به یو بنیادي اساسي قانون جوړ کړو.»
له مجاهد څخه په دې مرکه کې هم د خپرونې د کوربه او هم اورېدونکو له لوري بیا بیا د نجونو پر زده کړو د بندیز په اړه پوښتنې وشوې، بالاخره یې وویل چې دی هم په دې اړه څه نه شي ویلی او ځواب نه لري.