تاند ( پنج شنبه د سلواغې ـ دلوې ۹مه)کابل کې نن پنج شنبه د سرطاني ناروغیو د تشخیص او درملنې ملي روغتون پرانیستل شو.
د دغه روغتون په پرانیسته کې د روغتیا نړیوال سازمان او نورو سازمانونو په ګډون ګڼو بهرنیو روغتیايي او د طالبانو حکومت چارواکو ګډون کړی و.
په جوړو شویو مراسمو کې د افغانستان لپاره د روغتیا نړیوال سازمان مشر ډاکټر اېډوېن سېنېزا سلوادور وویل، دا یو مهم پړاو دی چې په افغانستان کې د سرطان د درملنې لپاره د دوی د ګډې ژمنتیا څرګندونه کوي.
د روغتیا نړیوال سازمان دغه چارواکی وایي، له افغانستانه څه باندې ۶۰ ډاکټران، نرسان او درمل جوړوونکي د آنکولوژۍ، د کیموتراپي د تطبیق او د تسکیني پاملرنې په برخه کې روزل شوي دي.
ډاکټر اېډوېن سېنېزا سلوادور یادو مراسمو ته د راډیوتراپي یا د وړانګو په مټ د درملنې د اسانتیاوو رامنځته کولو ژمنه هم وکړه چې په وینا یې نور به افغانان اړ نه وي چې د درملنې لپاره بهرنیو هېوادونو ته ولاړ شي.
بل لورته بیا د طالبانو د عامې روغتیا وزیر نور جلال جلالي وایي، چې هند له افغانستان سره تر دا مهاله د سرطاني ناروغیو په برخه کې یو مېلیون ډالر مرسته کړې ده.
نوموړي ویلي چې، په یاد روغتون کې به د هند په مالي او تخنیکي مرسته د راډیوتراپۍ څانګه فعاله شي. جلالي وایي چې هند به د مسلکي او تخصصي ډاکټرانو د روزنې په برخه کې هم همکاري وکړي.
د جلالي په وینا؛ هند له افغانستان سره لس ټنه د سرطاني ناروغیو د درملو مرسته کړې، چې ارزښت یې په تخمیني ډول شاوخوا یو مېلیون امریکایي ډالرو ته رسېږي. نوموړي له شتمنو کسانو او پانګهوالو هم غوښتي، چې د دغه روغتون د دوام او پراختیا لپاره دې مالي ملاتړ وکړي.