تاند (چهارشنبه، د سلواغې/ دلوې ۸ مه) په داسي حال کې چې د نړۍ په ډېرو هېوادونو (شمالي نیم کُره) کې ژمی او هوا سړه ده، اسټرالیا د سختې ګرمۍ تر اغېز لاندې ده، چې تودوخې درجه پکې د سانتي ګراد نژدې ۴۹ پورې رسېږي.
پرون د اسټرالیا په ویکټوریا ایالت کې تر ټولو توده ورځ وه او تودوخه یې د سانتي ګراد ۴۸ اعشاریه ۹ درجې ثبت شوه.
له بلې خوا، په نیو ساوت وېلز، کوینزلنډ، تسمانیا او نورو ایالتونو کې هم تر سبا پورې د سختې ګرمۍ خبرداری ورکړل شوی دی.
په مېلبورن کې له ۳۷ اعشاریه ۸ درجې ګرمۍ وروسته، په سرخلاصو میدانونو کې د اسټرالین اوپن سیالیو د ټېنس سیالۍ ودرول شوې. همداراز میدانونو کې د لوبغاړو تمرینونه او نورې ورزشي چارې ودرول شوې.
د سختې ګرمۍ له امله د جنوب ختیځو سیمو په ځنګلونو کې د اور لګېدو خطر زیات شوی او د اور د خطر خبرداري هم خپاره شوي دي.
اوس چې په شمالي نیم کُره کې ژمی دی، په جنوبي نیم کُره کې دوبی دی.
- هغه هیوادونه چې اوس پکې اوړی دی، دا دي:
- اسټرالیا
- نويزیلنډ
- جنوبي افریقا
- نمیبیا
- بوتسوانا
- زمبابوې
- موزمبیق
د جنوبي امریکا هېوادونه:
- ارجنټاین
- چیلي
- یوروګوای
- پاراګوای
- برازیل (لویه برخه)
- بولیویا (سویلي برخه)
- د اسیا ـ اوقیانوسیې ټاپوګان:
- اندونیزیا (سویلي ټاپوګان)
- پاپوا نیو ګینا
- سلیمان ټاپوګان
- فیجي
- مدغاسکر، پيرو (سویلي سیمې)