تاند (جمعه د سلواغې ـ دلوې ۳مه) د طالبانو د ټولګټو وزارت وایي، د سالنګو د څارنې او ساتنې عملیاتي ټیم دوشاخ سیمه کې د واوري ښویېدني له کبله بند پاتې مسافر وژغورل شول.
د یاد وزارت ویاند محمد اشرف حقشناس ویلي، د تېزې واورې او طوفان له کبله پرون پنج شنبه ناوخته دوشاخ سیمه کې یو هوټل او څو هټۍ تر واورو لاندې شوې، چې پایله کې یې دوو تنو ژوند بایللی او ۱۲نور ټپیان شوي.
دغه راز دغې پېښه کې یو تن نادرکه شوی و چې وروسته د عملیاتي ټیم په هلو ځلو له واورو را ایستل شوی.
حقشناس ویلي، نن ورځ هم سویلي سالنګ کې طوفان او تېز باد جریان لري.
نوموړي له هېوادوالو غوښتي، چې د شرایط تر مساعدو دې له دې لارې په سفر کولو ډډه وکړي.
دغه راز نن دوهمه ورځ ده چې د کابل په ګډون په ګڼو ولایتونو کې واوره او باران وریږي او یو شمېر ولایتونو کې د لارو د بندېدو ترڅنګ مالي او ځاني زیانونه هم اړولي خو لا یې په اړه بشپړ مالومات نه دی خپاره شوي.