تاند ( چهارشنبه د سلواغې ـ دلوې لومړۍ) د الجزیرې د راپور له مخې، جاپان چمتو دی چې د نړۍ تر ټولو لوی اټومي برېښناکوټ بېرته فعال کړي.
جاپان له فوکوشیما ناورین وروسته چې شاوخوا پنځلس کاله مخکې یې په ټول هېواد کې اټومي بټۍ وتړلې، یو ځل بیا د انرژۍ دې سرچینې ته ورګرځي.
د توکیو برېښنا شرکت (TEPCO) د چهارشنبې په ورځ وویل چې، دا مهال «د چمتووالي بهیر روان دی» او هڅه کوي چې د نیګاتا ولایت د کاشیوازاکي–کاریوا په برېښناکوټ کې عملیات د ماښام په ۷:۰۰ بجو (۱۰:۰۰ د ګرینویچ پر وخت) بېرته پیل کړي.
خو سره له دې، د خوندیتوب اندېښنې لا هم پر ځای پاتې دي.
په ۲۰۱۱ کال کې د فوکوشیما (meltdown) مولټ ډاون چې د یوې سترې زلزلې او سونامي له امله رامنځته شوه او د TEPCO لهخوا اداره کېدله، د هېواد پر اټومي انرژۍ بنسټونو د خلکو باور له منځه یووړ.
د سرچینې د مالوماتو له مخې د کاشیوازاکي–کاریوا له اوو رېکټرونو څخه به یوازې یو رېکټر د چهارشنبې په ورځ بېرته فعال شي.
د الجزیرې د راپور له مخې کله چې دا برېښناکوټ په بشپړه توګه فعال وي، نو ۸٫۲ ګیګاواټه برېښنا به تولید کړي، چې د میلیونو کورنیو د برېښنا اړتیا پوره کولی شي.
دا برېښناکوټ د نیګاتا په ولایت کې، د جاپان سمندرګي پر غاړه، پر ۴٫۲ مربع کیلومتره (۱٫۶ مربع میله) ځمکه جوړ دی.
جاپان، چې د سمندر له غاړې د بادي برېښنا د پراختیا په برخه کې له ستونزو سره مخ شوی، اوس یې د انرژۍ د امنیت د پیاوړتیا او پر وارداتي فوسیلي سونتوکو د اتکا د کمولو لپاره بېرته اټومي برېښنا ته مخه کړې ده.
د راپور له مخې کاشیوازاکي–کاریوا هغه پنځلسم برېښناکوټ دی چې له ۳۳ د فعالیت وړ برېښناکوټونو څخه بېرته فعالېږي.
د یادونې وړ ده چې، جاپان د ۲۰۱۱ کال د ناورین وروسته خپل ټول ۵۴ اټومي رېکټرونه وتړل.
د جاپان حکومت په دې وروستیو کې د دولتي تمویل یوه نوې طرحه اعلان کړې، تر څو د اټومي برېښنا بېرته فعالول چټک کړي.