تاند (دوشنبه، د مرغومي/ جدې ۲۹ مه) پاکستان وايي، د ۲۰۲۵ کال د سپتمبر له لومړۍ نېټې څخه، چې د افغان کډوالو د ایستلو (ستنېدو) درېیم پړاو پیل شوی، تر اوسه له ۲ لکه ۷۵ زره څخه زیات کسان بېرته ستانه شوي دي.
پامستاني رسنیو پرون (شنبې) راپور ورکړ، د افغان وګړو د بېرته ستنولو د بهیر تر چتر لاندې تر اوسه پورې ۲ لکه ۷۵ زره او ۱۸۳ افغان وګړي بېرته لېږل شوي دي. د افغان وګړو د ستنولو لپاره تر اوسه په درې پړاوونو کې اقدامات شوي دي.
د لومړي پړاو په ترڅ کې، د ۲۰۲۳ کال د نوومبر له لومړۍ څخه د ۲۰۲۵ کال د فبرورۍ تر ۱۴مې پورې ۸۲ زره او ۹۱۶ افغان وګړي ایستل شوي، او په دوهم پړاو کې، د ۲۰۲۵ کال د فبرورۍ له ۱۵مې څخه د اګست تر ۳۱مې پورې ۴۴ زره او ۵۸۴ افغان وګړي بېرته خپل هېواد ته ستانه شوي دي.
د راپور له مخې، د ۲۰۲۵ کال د سپتمبر له لومړۍ څخه د افغان وګړو د ایستلو درېیم پړاو روان دی، چې تر دې دمه پکې ۱ لکه ۴۷ زره او ۶۸۳ افغان وګړي بېرته خپل هېواد ته ستانه شوي دي. په درېیم پړاو کې د چمن – سپین بولدک له لارې په خپله خوښه (رضاکارانه ډول) ۱ لک ۴۴ زره او ۲۵۳ افغان وګړي ستانه شوي دي.
د درېیم پړاو پر مهال، د سند ایالت له بېلابېلو ټرانزیت پواینټونو څخه په ټولیز ډول ۳ زره او ۴۳۰ افغان وګړي بېرته لېږل شوي دي. له کراچۍ څخه تر اوسه ۳ زره او ۳۲۷ افغان وګړي بېرته ستانه شوي، چې پکې ۲ زره او ۳۶۴ ناقانونه مېشت، ۱۳۶ د افغان تابعیت کارت لرونکي، او ۸۲۷ د استوګنې د ثبوت (پروف اف رېزیډنس) لرونکي افغان وګړي شامل دي.