تاند ( دوشنبه د مرغومي ـ جدي ۲۹مه) د پاکستان د کراچۍ ښار په ګل پلازه کې لګېدلی اورله ۳۳ ساعتونو وروسته مهار شوی دی.
د ژغورنې عملیاتو پر مهال ۸ نور مړي هم موندل شوي دي.
ځایي امنیتي چارواکو ویلي، چې په دې پېښه کې ۱۴ کسان مړه او ۲۲ نور ژوبل او سوزېدلي دي.
اور د اېم اې جناح سړک پر سر په ګل پلازه کې د شپې پر لسو بجو پیل شو، چې له امله یې د ودانۍ څو برخې ونړېدې.
چارواکو زیاته کړې، چې اور وژونکو تر ۳۳ ساعتونو وروسته اور مهار کړی او په سیمه کې لا هم د ژغورنې عملیات روان دي.
د دوی په وینا د ژغورنې په وروستیو عملیاتو کې یې د یوه ماشوم په ګډون د درېیو کسانو مړي موندلي او ځایي روغتون ته یې انتقال کړي دي.
په سیمه کې لا هم خلک د خپلو دوستانو د موندلو په لټه دي.
بل لورته بیا په یوه بله پېښه کې چې څو ورځې وړاندې شوې ده، افغان سوداګرو ویلي چې، د تېرې جمعې په ورځ د کراچۍ په سوداګریز بندر کې په سوداګریزو توکو بار د افغان سوداګرو ۹۸ کانټینره سوزېدلي دي.
افغان سوداګرو د دغه اور زیان پنځه مېلیونه ډالره ښودلی دی.